«QazMunaiGaz-Aero» JShS («QazMunaiGaz» UK AQ enshiles kásiporny) Qazaqstan Respýblikasynyń Qarýly Kúshteri men arnaiy memlekettik organdaryna munai ónimderin jetkizý boiynsha «Biryńǵai operator» fýnktsiiasy aiasynda sý tasqynynan eń kóp zardap shekken óńirlerge Qazaqstan Respýblikasy Tótenshe jaǵdailar ministrliginiń, Qazaqstan Respýblikasy Qorǵanys ministrliginiń, Ulttyq ulannyń qajettilikterine sai munai ónimderin úzdiksiz jetkizýdi qamtamasyz etedi.
Sonymen qatar qazirgi tańda oblys ákimdikterindegi sý tasqynyna qarsy is-sharalardy úilestirý jáne kóktemgi sý tasqyny saldaryn joiý jónindegi shtabtyń tapsyrysy boiynsha óńirlerge munai ónimderiniń qajetti kólemi jetkizilip jatyr.
«QazMunaiGaz-Aero» JShS jumysshylary kóktemgi sý tasqynynan zardap shekken eldi mekenderge kómek kórsetý úshin bir kúndik jalaqysyn aýdardy.
Sonymen birge Atyraý munai óńdeý zaýytynda jedel shtab jáne 150 zaýyt jumysshylarynan turatyn jumyldyrý jasaǵy quryldy. Olar oblys ákimdigi bekitken aýmaqta sý tasqynyna qarsy sharalarǵa qatysady. Budan bólek, Atyraý munai óńdeý zaýyty arnaiy tehnika, jeke qorǵanys quraldary men ózge de qural-saimandarmen qamtamasyz etetin bolady. Qajet bolǵan jaǵdaida, zaýyt halyqty evakýatsiialaý úshin kólik berýge daiyn.
Búgin, 4 sáýirde, «QazMunaiGaz» UK AQ Atyraý munai óńdeý zaýyty arqyly Jylyoi aýdanyna 20 tonna dizel otynyn jóneltti. Sondai-aq AMÓZ Mahambet aýdanyna janar-jaǵarmai saqtaýǵa arnalǵan syiymdylyqtar men jaǵalaýdy qorǵaý jumystary úshin qajetti qural-jabdyqtardy berip jiberdi.
Buǵan qosa kásiporyn ujymy Atyraý oblysynyń kóktemgi sý tasqynynan zardap shekkenderge qarjylai kómek retinde birkúndik jalaqysyn aýdarady.
QMG tobynyń basqa kompaniialarynyń qyzmetkerleri de sý tasqynynan zardap shekken otbasylarǵa qarjy jinap jatyr.
Mysaly, KRI («Kazakhstan Petrochemical Industries Inc») kompaniiasynyń qyzmetkerleri Atyraý oblysynyń sý tasqynynan zardap shegip jatqan aýyldaryna kómektesý maqsatynda qarjylai kómek jinap jatyr. Jinalǵan qarajatqa gýmanitarlyq, qarjylyq, áleýmettik kómek kórsetý josparlanyp otyr.
