Sharaǵa elimizdiń túkpir-túkpirinen mal sharýashylyǵynyń qyr-syryn biletin 200-ge jýyq maman qatysty. Budan bólek mal sharýashylyǵymen ainalysatyn kásiporyndarmen men ǵylymi uiymdar da osy sharany ótkizýge óz úlesin qosty.
Mańyzdy jiynǵa Soltústik Qazaqstan oblysynyń ákimi Qumar Aqsaqalov pen Aýyl sharýashylyǵy ministri Erbol Qarashókeev arnaiy kelip, osynaý jiynnyń máni men mańyzy týraly óz pikirin bildirdi.
Elimizdiń aýylsharýashylyǵy salasyndaǵy jetistikterin pash etken mańyzdy jiynda saladaǵy ózekti máseleler sóz boldy. Sharýa qojalyqtarynyń basshylary ózara pikir almasyp, salany sapalandyrýǵa qatysty tájiribesimen bólisti.
Shara barysynda qatysýshylar Taiynsha, Aqqaiyń jáne Qyzyljar aýdandaryn aralaityn bolady. Atalǵan aýdandarda ornalasqan mal sharýashylyǵy ónimderin óńdeitin kompaniialardyń jumysymen tanysyp, tájiribe almasady.
Aita ketelik, Qyzyljar óńiriniń osynaý eldi-mekenderinde «BIOOPERATIONS», «Emc-agro» JShS-y, «Severnyi broiler» JShS-y, «Qyzyljar-Sút» JShS-y, «Ivan Zenchenko» JShS-y jáne «Daiyndyk» sekildi tanymal kompaniialar ornalasqan.
Shara barysynda qadirmendi meimandar osynaý kompaniialar ázirlegen aýylsharýashyly ónimderinen aýyz tidi. Mamandarǵa saladaǵy jańa tehnologiialar men qurylǵylar, asyl tuqymdy iri-qaraǵa qajetti jem-shóp ázirleý ádisteri men jańa úlgidegi veterinarlyq dári-dármek tanys etildi.
"Aýyl sharýashylyǵyn damytý úshin birinshi kezekte mal sharýashylyǵyn kóńil bólý qajet. Bul turǵyda soltústik qazaqstandyq sharýalar aýyz toltyryp aitarlyqtai jetistiktikke jetti.
Tek biylǵy jyldyń ózinde óńirde quny 71 mlrd teńgeden asyp jyǵylatyn 31 joba júzege asýda.
Aimaqta 22 sút fermasy bar, taǵy 17 nysannyń qurylysy júrip jatyr. Jyl aiaǵyna deiin 8 sút óndiretin keshendi iske qosamyz. Budan bólek 3 qus fabrikasy salynýda. Mal bordaqylaityn alańdar qoldanysqa berilgen. Soltústik Qazaqstan óńiriniń aýyl sharýashylyǵy salasyndaǵy tájiribesi tolaiym. Osynaý slet malshylar qaýymynyń pikir almasýyna qajetti alańǵa ainalaryna senemin", – dedi óz sózinde Qyzyljar óńiriniń ákimi Qumar Aqsaqalov.
