«Qazgidromet» RMK 29 jeltoqsan kúni Qazaqstannyń birqatar óńirinde aýa raiynyń qolaisyz bolýyna bailanysty daýyldy eskertý jasady, dep habarlaidy Dalanews.kz
Sinoptikterdiń boljamynsha, eldiń kóptegen aimaǵynda qar, burqasyn, tuman, kóktaiǵaq jáne jeldiń kúsheiýi kútiledi. Jeldiń ekpini kei óńirlerde sekýndyna 15–20 metrge deiin jetedi.
Atap aitqanda, Qyzylorda oblysynda túnde jáne tańerteń joldarda kóktaiǵaq bolyp, oblystyń soltústigi men ortalyǵynda tuman túsedi. Jel ońtústik-shyǵystan soǵyp, kúndiz kúsheiedi.
Batys Qazaqstan, Aqmola, Qostanai, Soltústik Qazaqstan, Ulytaý jáne Aqtóbe oblystarynda qar jaýyp, jaiaý burqasyn men kóktaiǵaq kútiledi. Kei aimaqtarda tuman baiqalady. Jeldiń ekpini 15–20 m/s-qa deiin jetýi múmkin.
Almaty, Jetisý, Jambyl jáne Túrkistan oblystarynda tuman túsip, taýly jáne taý asýlary bar óńirlerde kóktaiǵaq bolady. Jel kúsheiip, ásirese taýly aimaqtarda qaýip artady.
Qaraǵandy, Pavlodar, Abai, Shyǵys Qazaqstan jáne Mańǵystaý oblystarynda da tuman men kóktaiǵaq kútiledi, kei óńirlerde qar men burqasyn bolady.
Iri qalalarda, sonyń ishinde Almaty, Atyraý, Oral, Qostanai, Taraz, Taldyqorǵan jáne Jezqazǵan qalalarynda tuman, kóktaiǵaq jáne jeldiń kúsheiýi boljanyp otyr.
Osyǵan bailanysty «Qazgidromet» turǵyndardy, ásirese júrgizýshilerdi jol qozǵalysy kezinde barynsha saq bolýǵa, alys jolǵa shyqpaýǵa, aýa raiy jaǵdaiyn eskerýge shaqyrady.
