“QazAvtoJoldyń” burynǵy basshysy 8 jylǵa bas bostandyǵynan aıyryldy, - dep habarlaıdy Dalanews.kz.

Resmı derekterge súıensek, is boıynsha eki adam aıyptalǵan, olardyń biri – «QazAvtoJol» basqarmasynyń burynǵy tóraǵasy.

«Qylmystyq tergeý organy M. jáne J.-ny aldyn ala sóz baılasý arqyly, qyzmet babyn paıdalana otyryp, asa iri mólsherde senip tapsyrylǵan múlikti ıemdený jáne jymqyrý (QK 189-babynyń 4-bóligi, 2-tarmaǵy) boıynsha aıyptady. Tergeý barysynda M. men J. 2000 jyldardan beri tanys ekeni anyqtaldy. Sottalýshy M. 2017-2019 jyldary Aqmola oblysynyń jolaýshylar kóligi jáne avtomobıl joldary basqarmasyn basqarǵan, 2019-2021 jyldary oblys ákiminiń orynbasary qyzmetin atqarǵan jáne “Jaqsy-Esil-Buzýlyq” avtojolyndaǵy Esil ózeniniń ústindegi kópirde oryn alǵan máselelerden habardar bolǵan», – delingen sot habarlamasynda.

2019 jyly M. Aqmola oblysy ákiminiń orynbasary qyzmetine taǵaıyndaldy. Sol jyly «QazAvtoJol» AQ-nyń Aqmola fılıaly men J. basqarǵan «Asyl-JAS» JSHS arasynda atalǵan kópirdi jóndeý boıynsha quny 2,2 mıllıard teńgeni quraıtyn kelisimshart jasalǵan. Sotta bul qarajat merdigerge aýdarylmaǵany anyqtaldy.

2021 jyldyń sáýirinde M. «QazAvtoJol» ulttyq kompanıasynyń basqarma tóraǵasy bolyp taǵaıyndalǵan. Al maýsym aıynda tapsyrys berýshi bastamasymen kelisimshart buzylyp, merdiger «Asyl-JAS» JSHS bul sheshimge sot tártibimen shaǵymdanbaǵan.

«2021 jyldyń shilde-tamyz aılarynda M. J. men basqa da múddeli tulǵalardyń qatysýymen jınalys ótkizip, “Asyl-JAS” JSHS-men bir kózden satyp alý tásili arqyly kelisimshart jasaý máselesin kótergen. Mundaı jınalys ótkizýge esh negiz bolmaǵan. J. tarapynan jazbasha ótinish túspegen. 2021 jylǵy 20 qazanda M. “Asyl-JAS” JSHS-niń basshysy J.-nyń “QazAvtoJol” kompanıasyna 2019 jyly buzylǵan kelisimshart boıynsha qaryzy bar degen syltaýmen sotqa shaǵym túsirýi múmkin ekenin alǵa tartyp, bir kózden satyp alý tásili arqyly Dike konsorsıýmymen jáne “Asyl-JAS” JSHS-men 2,2 mıllıard teńgeden astam somaǵa jańa kelisimshart jasaý týraly zańsyz buıryq shyǵarǵan», – delingen sot habarlamasynda.

Sotta anyqtalǵandaı, 2020 jyldyń 21 qańtary men 2021 jyldyń 7 qazanyndaǵy sot sheshimderi boıynsha «Asyl-JAS» JSHS jáne Dike JSHS-ge ońaltý rásimderi qoldanylǵan, olardyń qaryzdary tıisinshe 264 mıllıon jáne 685 mıllıon teńgeden asqan. Konsorsıým músheleriniń qarjylyq turaqsyzdyǵy jáne kelisimshartty oryndaý múmkindiginiń bolmaǵany da anyqtaldy.

«2021 jylǵy 21 qazanda M.-niń buıryǵyna sáıkes Aqmola fılıaly konsorsıýmmen kelisimshart jasasty. 2021 jylǵy 28 jeltoqsanda kelisimshart aıasynda “Asyl-JAS” JSHS-niń esepshotyna 200 mıllıon teńge avans aýdarylyp, ol M. men J. tarapynan jymqyrylǵan», – dep habarlady sot.

Memleketke keltirilgen shyǵyn ótelmegen. Aıyptalýshylar kinásin moıyndamaǵan jáne olardy aqtaýdy suraǵan.

«Qylmystyń aýyrlyǵy, memleketke keltirilgen asa iri mólsherdegi shyǵynnyń ótelmeýi, jeńildetetin jáne aýyrlatatyn jaǵdaılardyń bolmaýy eskerilip, sot mynadaı úkim shyǵardy: M. (QazAvtoJoldyń eks-basshysy) – 8 jylǵa bas bostandyǵynan aıyrý, memlekettik qyzmette jáne kvazımemlekettik sektor sýbektilerinde ómir boıy qyzmet atqarý quqyǵynan aıyrý. J. – 8 jylǵa bas bostandyǵynan aıyrý, múlkin tárkileý jáne qarjy men komersıalyq uıymdarda 10 jyl boıy basshylyq qyzmet atqarý quqyǵynan aıyrý. “QazAvtoJol” ulttyq kompanıasynyń azamattyq shaǵymy qanaǵattandyryldy», – delingen sot úkiminde.

Úkim zańdy kúshine engen joq.