“قازاۆتوجولدىڭ” بۇرىنعى باسشىسى 8 جىلعا باس بوستاندىعىنان ايىرىلدى، - دەپ حابارلايدى Dalanews.kz.
رەسمي دەرەكتەرگە سۇيەنسەك، ءىس بويىنشا ەكى ادام ايىپتالعان، ولاردىڭ ءبىرى – «قازاۆتوجول» باسقارماسىنىڭ بۇرىنعى ءتوراعاسى.
«قىلمىستىق تەرگەۋ ورگانى م. جانە ج.-نى الدىن الا ءسوز بايلاسۋ ارقىلى، قىزمەت بابىن پايدالانا وتىرىپ، اسا ءىرى مولشەردە سەنىپ تاپسىرىلعان مۇلىكتى يەمدەنۋ جانە جىمقىرۋ (قك 189-بابىنىڭ 4-بولىگى، 2-تارماعى) بويىنشا ايىپتادى. تەرگەۋ بارىسىندا م. مەن ج. 2000 جىلداردان بەرى تانىس ەكەنى انىقتالدى. سوتتالۋشى م. 2017-2019 جىلدارى اقمولا وبلىسىنىڭ جولاۋشىلار كولىگى جانە اۆتوموبيل جولدارى باسقارماسىن باسقارعان، 2019-2021 جىلدارى وبلىس اكىمىنىڭ ورىنباسارى قىزمەتىن اتقارعان جانە “جاقسى-ەسىل-بۇزۋلىق” اۆتوجولىنداعى ەسىل وزەنىنىڭ ۇستىندەگى كوپىردە ورىن العان ماسەلەلەردەن حاباردار بولعان»، – دەلىنگەن سوت حابارلاماسىندا.
2019 جىلى م. اقمولا وبلىسى اكىمىنىڭ ورىنباسارى قىزمەتىنە تاعايىندالدى. سول جىلى «قازاۆتوجول» اق-نىڭ اقمولا فيليالى مەن ج. باسقارعان «اسىل-جاس» ج ش س اراسىندا اتالعان كوپىردى جوندەۋ بويىنشا قۇنى 2،2 ميلليارد تەڭگەنى قۇرايتىن كەلىسىمشارت جاسالعان. سوتتا بۇل قاراجات مەردىگەرگە اۋدارىلماعانى انىقتالدى.
2021 جىلدىڭ ساۋىرىندە م. «قازاۆتوجول» ۇلتتىق كومپانياسىنىڭ باسقارما ءتوراعاسى بولىپ تاعايىندالعان. ال ماۋسىم ايىندا تاپسىرىس بەرۋشى باستاماسىمەن كەلىسىمشارت بۇزىلىپ، مەردىگەر «اسىل-جاس» ج ش س بۇل شەشىمگە سوت تارتىبىمەن شاعىمدانباعان.
«2021 جىلدىڭ شىلدە-تامىز ايلارىندا م. ج. مەن باسقا دا مۇددەلى تۇلعالاردىڭ قاتىسۋىمەن جينالىس وتكىزىپ، “اسىل-جاس” جشس-مەن ءبىر كوزدەن ساتىپ الۋ ءتاسىلى ارقىلى كەلىسىمشارت جاساۋ ماسەلەسىن كوتەرگەن. مۇنداي جينالىس وتكىزۋگە ەش نەگىز بولماعان. ج. تاراپىنان جازباشا ءوتىنىش تۇسپەگەن. 2021 جىلعى 20 قازاندا م. “اسىل-جاس” ءجشس-نىڭ باسشىسى ج.-نىڭ “قازاۆتوجول” كومپانياسىنا 2019 جىلى بۇزىلعان كەلىسىمشارت بويىنشا قارىزى بار دەگەن سىلتاۋمەن سوتقا شاعىم ءتۇسىرۋى مۇمكىن ەكەنىن العا تارتىپ، ءبىر كوزدەن ساتىپ الۋ ءتاسىلى ارقىلى Dike كونسورسيۋمىمەن جانە “اسىل-جاس” جشس-مەن 2،2 ميلليارد تەڭگەدەن استام سوماعا جاڭا كەلىسىمشارت جاساۋ تۋرالى زاڭسىز بۇيرىق شىعارعان»، – دەلىنگەن سوت حابارلاماسىندا.
سوتتا انىقتالعانداي، 2020 جىلدىڭ 21 قاڭتارى مەن 2021 جىلدىڭ 7 قازانىنداعى سوت شەشىمدەرى بويىنشا «اسىل-جاس» ج ش س جانە Dike جشس-گە وڭالتۋ راسىمدەرى قولدانىلعان، ولاردىڭ قارىزدارى تيىسىنشە 264 ميلليون جانە 685 ميلليون تەڭگەدەن اسقان. كونسورسيۋم مۇشەلەرىنىڭ قارجىلىق تۇراقسىزدىعى جانە كەلىسىمشارتتى ورىنداۋ مۇمكىندىگىنىڭ بولماعانى دا انىقتالدى.
«2021 جىلعى 21 قازاندا م.ء-نىڭ بۇيرىعىنا سايكەس اقمولا فيليالى كونسورسيۋممەن كەلىسىمشارت جاساستى. 2021 جىلعى 28 جەلتوقساندا كەلىسىمشارت اياسىندا “اسىل-جاس” ءجشس-نىڭ ەسەپشوتىنا 200 ميلليون تەڭگە اۆانس اۋدارىلىپ، ول م. مەن ج. تاراپىنان جىمقىرىلعان»، – دەپ حابارلادى سوت.
مەملەكەتكە كەلتىرىلگەن شىعىن وتەلمەگەن. ايىپتالۋشىلار كىناسىن مويىنداماعان جانە ولاردى اقتاۋدى سۇراعان.
«قىلمىستىڭ اۋىرلىعى، مەملەكەتكە كەلتىرىلگەن اسا ءىرى مولشەردەگى شىعىننىڭ وتەلمەۋى، جەڭىلدەتەتىن جانە اۋىرلاتاتىن جاعدايلاردىڭ بولماۋى ەسكەرىلىپ، سوت مىناداي ۇكىم شىعاردى: م. (قازاۆتوجولدىڭ ەكس-باسشىسى) – 8 جىلعا باس بوستاندىعىنان ايىرۋ، مەملەكەتتىك قىزمەتتە جانە كۆازيمەملەكەتتىك سەكتور سۋبەكتىلەرىندە ءومىر بويى قىزمەت اتقارۋ قۇقىعىنان ايىرۋ. ج. – 8 جىلعا باس بوستاندىعىنان ايىرۋ، مۇلكىن تاركىلەۋ جانە قارجى مەن كوممەرسيالىق ۇيىمداردا 10 جىل بويى باسشىلىق قىزمەت اتقارۋ قۇقىعىنان ايىرۋ. “قازاۆتوجول” ۇلتتىق كومپانياسىنىڭ ازاماتتىق شاعىمى قاناعاتتاندىرىلدى»، – دەلىنگەن سوت ۇكىمىندە.
ۇكىم زاڭدى كۇشىنە ەنگەن جوق.
