QR Eńbek jáne halyqty áleýmettik qorǵaý vitse-ministri Asqarbek Ertaev Ońtústik Koreiaǵa jumys sapary aiasynda Koreia Respýblikasy Jumyspen qamtý jáne eńbek ministrliginiń ókilderimen kezdesý ótkizdi. Osy kezdesýde shetelde jumys istep júrgen otandastarymyz úshin ózekti - zańdy eńbek máselesi keńinen talqylandy, dep jazady Dalanews.kz.
QR Eńbek jáne halyqty áleýmettik qorǵaý ministrliginiń baspasóz qyzmeti kelissózder barysynda taraptar Qazaqstandy Ońtústik Koreiadaǵy eńbekke ruqsat beretin Employment Permit System júiesine engizý máselelerin talqylaǵanyn naqtylaidy.
"Qazaqstan migranttardyń eńbek jáne áleýmettik quqyqtaryn qorǵaý úshin quqyqtyq bazany odan ári jaqsartýǵa baǵyttalǵan birqatar keshendi sharalar qabyldaýda. Atap aitqanda, Almaty qalasynda Koreia Respýblikasynda jumys istegisi keletin Qazaqstan Respýblikasynyń azamattaryn kásiptik jáne tildik daiarlaý boiynsha kópsalaly ortalyq qurylýda", – dedi Asqarbek Ertaev.
Sondai-aq, ol tehnikalyq mamandyqtar boiynsha testileý, meditsinalyq tekserý, biliktilikti arttyrý boiynsha oqytýǵa daiyn birqatar áleýmettik jáne óndiristik obektiler anyqtalǵanyn habarlady.
"QR Ishki ister ministrligimen birlesip zańsyz kóshi-qonnyń jolyn kesýge jáne zańdy eńbek qyzmetin keńeitý úshin jaǵdai jasaýǵa baǵyttalǵan sharalardy kúsheitý máseleleri pysyqtalýda", – dep tolyqtyrdy vitse-ministr.
Kelissózder qorytyndysy boiynsha Koreia Respýblikasy Jumyspen qamtý jáne eńbek ministrliginiń ókilderi Qazaqstandy EPS júiesine qosý týraly nietin taǵy da rastady, bul Qazaqstan azamattaryna jasalǵan eńbek sharttary sheńberinde Ońtústik Koreiada zańdy túrde jumys isteýge múmkindik beredi.
Kezdesý sońynda taraptar Qazaqstan men Ońtústik Koreia arasyndaǵy eńbek kóshi-qony salasyndaǵy yntymaqtastyqty tereńdetýdiń mańyzdylyǵyn atap ótti, bul shetelde jumysqa ornalasýǵa umtylatyn qazaqstandyq azamattar úshin jaǵdaidy jaqsartýǵa, sondai-aq olardyń kásibi daiarlyq deńgeiin arttyrýǵa múmkindik beredi.
