Arman Jumageldiev úndeýinde qańtarda alańǵa halyqty, el táýelsizdigin qorǵaý úshin shyqqanyn aitqan.
– Biri túsinse, biri túsine bermeidi. Shynymen halqymdy qorǵaimyn dep, táýelsizdigimizdi saqtaý úshin alańǵa shyqtym. Elime, jerime, halqyma qiyn jaǵdaida kómek kórsetý úshin shyqtym. Biraq sondai jaqsylyq istegennen keiin túrmede otyrǵanyma qapalymyn. Qazaqta osyndai jaman ádet bar. Ózimizdiń batyrlarymyzdy óz qolymyzben túrmege tyǵyp, ólgen soń "batyr edi" dep maqtap otyramyz. Men shynymen óz halqym úshin, elim úshin, memleket úshin shyqtym. Alaida muny bilik te, halyq ta baǵalai almady, – deidi Jumageldiev úndeýinde.
Sondai-aq ol qańtardaǵy qaqtyǵystarda politsiia qyzmetkerleri men UQK ókilderi qashyp ketti, halyqty qorǵaityn eshkim bolmady dep otyr.
– Elde shynymen qaqtyǵys, tártipsizdik boldy. Ǵimarattardy órtedi, adamdardy óltirdi. Politseiler de, Ulttyq qaýipsizdik qyzmet ókilderi de barlyǵyn tastap, qashyp ketti. Men óz elimniń azamaty retinde adamdardy beibitshilikke shaqyrdym. Tártipsizdik jasaýǵa qarsy ekenimdi aittym. Arandatýshylarǵa senip qalmasyn dep turǵyndardy qorǵaýǵa tyrystym. Táýelsizdigimizdiń taǵdyry qyl ústinde turdy. Men adamdardy óltirip, áielderdi zorlap jatqanyn estigen soń bir orynda otyra almadym. Qolymnan kelgenshe kómek kórsetkim keldi, – deidi "Dikii Arman"
Toqaevqa jasaǵan úndeýinde Jumageldiev óziniń kinásiz ekenin aityp, aqtaldy.
– Kez kelgen qylmystyń belgili bir motivi bolady. Men arandatýshylar men moraderlerdi ustaǵanym úshin jazalanyp otyrmyn ba?! Alańda qaýipsizdikti qamtamasyz etetin eshkim bolmady, politsei de, UQK qyzmetkerleri de. Sol úshin áielder men balalardy qutqarǵym keldi. Meniń bar kinám osy bolǵany ma?! Bank kartalary istemei qalǵan adamdarǵa azyq-túlik taratqanym úshin kinálimin be?! Qalada osy jaǵdaidy paidalanyp júrgen ury-qarylar, esirki shegip, ishimdik iship bassyzdyq jasaǵandar boldy. Sonda erteń jerimizge jaý kirgende alańǵa shyqpai, úiimizde tyǵylyp otyrýymyz kerek pe? Bul bizdiń memleketimiz bolǵandyqtan, biz ony qorǵaýǵa mindettimiz. Ákimder men generaldardyń ózi tyǵylyp qalǵan kezde men alańǵa shyqtym, – deidi ol.
Arman Jumageldiev alańda arandatýshylar ózine shabýyl jasaǵanyn, basynan jaraqat alǵanyn aitady.
– Halyqty arandatýshylardan qorǵaimyn dep jaraqat aldym. Óz ómirimdi qaterge tiktim. Meniń basymdy jaryp, saýsaǵymdy kesti. Nelikten? Sebebi men arandatýshylardyń qatarynda bolmadym. Olar sekildi "bilikti ózgerteiik, shabýyl jasaiyq" dep aitpadym. Eger solai aitqan bolsai bári qoldaityn edi. Biraq men olai aitpadym. Qazir ákimder men kei bilik ókilderi ózderiniń qatelikterin kórsetpei, "Arman jaman" dep jatyr. Olar myqty bolsa, sondai qiyn-qystaý kúni qaida boldy? Kim halyqtyń janynan tabyldy? Al men halyqtyń jaǵynda boldym. Olarǵa kómek kórsettim. Iá, men qazir qiyn kezde halyqty qorǵaǵanym úshin opyq jep otyrmyn, – dedi Arman Jumageldiev.
Budan bólek, Jumageldiev politsiia tarapynan kinásiz adamdarǵa qysym jasalyp jatqanyn da aitty.
– Qazirdiń ózinde politseiler kúdikti dep tapqan kinásiz adamdardy uryp-soǵyp, azaptap jatyr. Tipti múldem kinási joq adamdarǵa jala jabýda. Al olar sol kúni qaida boldy? Nege olar tyǵylyp qaldy? Nege ózderiniń azamattyq boryshyn sol kúni atqarmady? Ókinishtisi, meni halqym da, biligim de, óz memleketim de túsinbedi. Meniń dinim bilikke qarsy shyǵýǵa tyiym salǵan. Sol sebepti men eshqashan bilikke qarsy shyqpadym. Al osyndai bassyzdyq pen kóptegen adamnyń ólimine sebep bolǵan oqiǵany uiymdastyrǵandarǵa Allanyń laǵyneti bolsyn dep tileimin. Olar eki dúniede de ońbaidy, – dedi ol.
Úndeýiniń sońynda Arman Jumageldiev Toqaevtyń ádiletine senetinin aitqan. Ol prezidentten bólek halyqqa da úndeý jasady.
– Qurmetti Prezident, kinásiz adamdardy otbasyna qaýyshtyrýyńyzdy suraimyn. Arandatýshylardyń aldaýyna túsken kinásiz adamdarǵa keshirim berýińizdi suraimyn. Sondai-aq maǵan da keshirim berip, otbasymmen qaýyshýyma múmkindik berińiz. Men óz elimniń patriotymyn. Elimdi, Otanymdy jaqsy kóremin. Men sizdiń keshirimińiz ben ádiletińizge senim artamyn. Halqym, biz birge bolýymyz kerek. Bul qiyn synaqtan birlik arqyly óte alamyz. Bul táýelsizdikti ata-babamyz armandady. Batyrlarymyz ben handarymyz jete almaǵan táýelsizdikti saqtap qalýymyz kerek. Arandatýshylardyń arbaýyna senbeńizder. Osy oqiǵa bizdi bir etip, odan saiyn myqty bolýymyzǵa sebep bolady degen senimdemin, – dep sózin aiaqtady Arman Jumageldiev.
