9 jeltoqsan kúni Astanada AO «Qazaqtelekom» uıymdastyrǵan «Be Safe: jeke jaýapkershilik jáne kóshbasshylyq» forýmynyń alǵashqy otyrysy ótti. Forým kompanıa qyzmetkeriniń Petropavl qalasynda qaıtys bolýyna oraı bir mınýttyq únsizdikpen bastaldy, dep habarlaıdy Dalanews.kz.
İs-sharanyń maqsaty – kompanıada eńbekti qorǵaý jáne qaýipsizdik mádenıetin arttyrý boldy. Forýmǵa shamamen 150 adam qatysty, onyń ishinde AO «Samuryq-Qazyna», qor portfeldik kompanıalary, fılıaldar men DAO AO «Qazaqtelekom», memlekettik organdar jáne halyqaralyq sarapshy ókilderi bar. Arnaıy qonaq retinde Máskeý qalasynan EVERYCO Central Asia Kazakhstan basqarýshy seriktesi Kırıl Zabýgın shaqyryldy. Ol paneldik sesıada sóz sóılep, basshylarǵa arnalǵan master-klasstar ótkizdi. Forým barysynda óndiristik qaýipsizdik pen eńbekti qorǵaý salasynda prosesterdi avtomattandyrý sheshimderi usynyldy. Qatysýshylarǵa qaýipsizdik boıynsha minez-qulyq aýdıti men minez-qulyqtyq dıalogty engizý, sondaı-aq ishki normatıvtik qujattardyń aýqymdy jańartylýy týraly aqparat berildi.
AO «Qazaqtelekom» Óndiristik qaýipsizdik dıreksıasynyń dırektory Nýrıa Mufteeva atap ótkendeı, «Telekomýnıkasıa salasy joǵary qaýipti sektorlarǵa jatpaǵanymen, bizdiń qyzmetkerler kún saıyn aýyr qaýipterge ushyraıdy: jol-kólik oqıǵalary, bıiktikte jumys isteý, elektr jabdyqtarymen jumys jáne basqa da qaýipti faktorlar. Kompanıada 2500-den astam kólik quraldary paıdalanýda, al kún saıyn shamamen 200 qaýipti jumystarǵa arnalǵan ruqsat qaǵazdary rásimdeledi, árbir tapsyrma joǵary tártip pen jaýapkershilikti talap etedi».
Forým kompanıadaǵy qaýipsizdik mádenıetin nyǵaıtýǵa baǵyttalǵan mańyzdy qadamǵa aınalyp, saladaǵy sarapshylar, basshylar men mamandardy ortaq maqsattar – jaýapkershilikti arttyrý, zamanaýı quraldardy engizý jáne árbir qyzmetkerge qaýipsiz eńbek jaǵdaıyn qamtamasyz etý – tóńireginde biriktirdi.
AO «Qazaqtelekom» Bas ákimshilik dırektory Erjan Meıramov paneldik sesıada: «Kóshbasshy tek áreketterimen ǵana emes, kózqarasymen de áser etedi, dál ata-analar balalardyń dúnıetanymyn qalyptastyratyn sıaqty. Qaýipsizdik – formaldylyq emes: JQQ, kaskalar jáne erejeler ómirdi qorǵaıdy, al olardy elemeý ózińe de, ózgelerge de qaýip tóndiredi», – dedi.
