«Qazaqtelekom» AQ ókilderi ózderine qatysty «Almaty aqshamy» jáne «Vechernii Almaty» gazetterinde jariialanǵan maqalalardy nazardan tys qaldyrmapty. Esterińizde bolsa, bul maqalalarda 8 megabit jyldamdyqtaǵy internet bailanys qyzmeti bizdiń basylymdarǵa orynsyz qymbat baǵamen berilgendigi aitylǵan.
Degenmen, Ulttyq operator biz kútkendei óz qatelikterin moiyndamady. Onyń ornyna «Alatay Aqparat» JShS-niń ústinen sotqa talap aryz jazyp, bul maqalalarda kórsetilgen málimetterdi teriske shyǵarýdy talap etip otyr. Bizdiń kompaniiaǵa sotqa deiingi habarlama kelip tústi. Onda Ulttyq bailanys operatorynyń bizden bas tartýdy talap etken tezisteri kórsetilgen.
Bizge kelgen habarlamanyń birinshi tarmaǵynda "Qazaqtelekom" alaiaq dep jalǵan aqparat taratyldy" dep kórsetilgen. Sondai-aq, sotqa deiingi habarlamada QR Qylmystyq kodeksi turǵysynan alaiaqtyq degen ne ekeni týraly túsinikteme berilgen. Alaida, osy tusta bizdiń Ulttyq operatordy óz maqalamyzda alaiaq dep aitpaǵanymyzdy túsiný kerek. Biz tek qana «Qazaqtelekom»-nyń is-áreketteri ádiletsiz qiturqy shemalarǵa uqsaidy dep boljam jasadyq.
Sondai-aq, Ulttyq bailanys operatory bizge kórsetilgen qyzmettiń quny 480 myń teńge bolǵanyn joqqa shyǵarýdy talap etken. Habarlamadan úzindi keltireiik: «Bul aqparat shyndyqqa sáikes kelmeidi, óitkeni qyzmetterdi ai saiynǵy pakettik qosý somasy men QQS-ny (qosylǵan qun salyǵyn) qosa alǵanda 223 500 teńge mólsherindegi somany quraǵan. Oǵan qosa bul somaǵa «8» nómiri arqyly jasalǵan ai saiynǵy halyqaralyq qońyraýlar jáne 18 qalalyq statsionarlyq nómir úshin abonenttik tólem eseptelgen. Qyzmet qunynyń jalpy somasy 332 500 teńgeden aspady».
Ulttyq bailanys operatory bul habarlama arqyly «naǵyz jomarttyq» kórsetip otyr – biz kórsetken somadan 150 myńǵa arzan, alaida óte baiaý internet bailanys úshin áli de tym soraqy baǵa.
«Segiz» nómiri arqyly jasalatyn halyqaralyq qońyraýlarǵa erekshe toqtalǵanymyz jón. Bailanys operatory aýysqan sońǵy eki jarym jyl ishinde bizdiń redaktsiiamyzdan mundai nebári bir qońyraý shalynǵan. Buǵan deiin bizdiń uiymǵa jazylǵan telefon nómirlerinen (esterińizge sala keteiik, olardyń sany úsh júzden astam) qalaaralyq qońyraýdy kim paidalanǵany túsiniksiz. Bul – «Qazaqtelekomǵa» qoiylatyn bólek suraq.
Habarlamanyń kelesi tarmaǵynda Almaty qalasynyń mamandandyrylǵan aýdanaralyq ekonomikalyq soty «jazbasha dálelderdi negizge ala otyryp, zańdy sheshim shyǵardy» dep málimdeidi. Sonymen qatar, «Qazaqtelekom» AQ ókilderi bul rette ózderiniń «Alatay Aqparat» JShS paidasyna qaita esepteý týraly ýádeleri bar hattarynyń sotta qaralmaý sebebi olar qate dep tanylyp, keri qaitarylýynda ekenin aitady. «Qatelik somany qaita esepteýdi júrgizgen Qoǵam qyzmetkeriniń kinásinen boldy («Qazaqtelekom». – Eskert. red.)». Iaǵni sotqa deiingi habarlamanyń ózinen biz Ulttyq operator qyzmetkerleriniń qaita esepteýmen ainalysyp, tipti «Alatay Aqparat» JShS-na hat jazǵanyn (qate dep tanylsa da) moiyndaitynyn kóre alamyz. Degenmen, bizdiń uiymǵa eshqandai aqsha qaitqan emes.
QazTAG ujymy bizdiń maqalalardy óz oqyrmandarymen bóliskendikten, sotqa deiingi habarlamanyń kóshirmesin aldy. Aitylǵan uiymdaǵy áriptesterimiz osy habarlamanyń bir qyzyq tusyn baiqaǵan. Sotqa deiingi habarlamaǵa buryn sybailas jemqorlyq boiynsha óz qylmysyn moiyndaǵan «Qazaqtelekom» AQ strategiialyq basqarý jónindegi bas direktory – Basqarma múshesi Batyr Mahanbetájiev qol qoiǵan.
Agenttik «Qazaqtelekomnyń» basty menedjerleriniń biri bolǵan Batyr Mahanbetájievtiń 2016 jyly Qazaqstan Mádeniet jáne aqparat ministrligi Aqparat jáne muraǵat komitetiniń burynǵy tóraǵasy Bolat Kalianbekov tarapynan sybailas jemqorlyq týraly is boiynsha ustalǵanyn jazady. Sol ýaqytta komitettiń burynǵy basshylary Bolat Bersebaev, Bek Arpabaev, Talǵat Qazanǵap, Janbolat Baibosynov ta ustaldy. Barlyq atalǵan tulǵalar, sonyń ishinde Mahanbetájiev te óz kinásin moiyndaǵan.
Osyǵan bailanysty QazTAG ókilderi Ulttyq bailanys operatorynyń baspasóz hatshysyna «Nege sybailas jemqorlyq boiynsha qylmysyn moiyndaǵan azamat Ulttyq kompaniiada joǵary qyzmet atqarady?» degen suraq joldady. Jaýap áli alynǵan joq…
Biz de osy suraqqa qosylamyz.
