Májilis depýtaty Marhabat Jaiymbetov sheteldik taksi agregatorlaryna qoiylatyn talaptardy qaita qaraý qajet ekenin málimdedi, dep habarlaidy Dalanews.kz.
Onyń aitýynsha, sandyq platformalardyń qarqyndy damýy saldarynan elimizde avtovokzaldardyń mańyzy joiylyp, qalaaralyq tasymal kólemi qysqaryp jatyr, al taksoparkter irilenip nemese múlde jabylyp jatyr.
– Qazaqstandaǵy júzdegen myń júrgizýshi taksi agregatorlaryna qatty táýeldi bolyp qaldy. Árbir tapsyrystan otandyq júrgizýshige nebári az ǵana tabys qalady, qalǵany shetelge ketedi. Bizdiń kúndelikti ómirimizge tereń engen bul servisterdiń belgili bir úlesi elimizdiń ishki qarjy ainalymynan tys qalyp otyr. Biz olarǵa táýeldi bola otyryp, ishki ekonomikamyzǵa eleýli shyǵyn keltirip otyrmyz, – dedi Jaiymbetov depýtattyq saýalynda.
Depýtattyń málimetinshe, tsifrlyq taksi platformalary júrgizýshiden 16 paiyzǵa deiin komissiia ustaidy, oǵan taksoparkter qosymsha 2-4 paiyz qosady. Sonyń saldarynan júrgizýshiniń negizgi tabysy komissiiaǵa ketip, laiyqty aqsha tabýǵa múmkindik qalmaidy.
– Sheteldik platformalar naryqtaǵy úlesin tiimdi paidalanyp, ústem jaǵdaiǵa ie bolyp otyr. Al otandyq qosymshalar qoldaýdyń azdyǵynan básekege tótep bere almaidy. Básekeniń joqtyǵy tutynýshylar tańdaýyn shekteidi, sapa men baǵa máseleleri sheshilmei qalady.
Azamattar jeke qabyldaý kezinde taksi tarifiniń negizsiz ósýine shaǵymdanyp júr. Ásirese mereke kúnderi nemese aýa raiy kúrt ózgergende baǵalar birden sharyqtap ketedi. Osylaisha sheteldik platformalar júrgizýshiler men jolaýshylardyń qarjysyn qosa alǵanda, ondaǵan milliard teńgeni el ekonomikasynan shyǵaryp otyr, – dedi depýtat.
Ulttyq qaýipsizdikke qaýip
Depýtattyń aitýynsha, bul jaǵdai eldiń ulttyq jáne ekonomikalyq qaýipsizdigine tikelei qaýip tóndiredi. Sonymen qatar, naryqtaǵy monopoliialyq jaǵdai bul platformalarǵa tabysty eshqandai baqylaýsyz ulǵaitýǵa múmkindik berip otyr.
Usynystar
Jaǵdaidy túzetý úshin Jaiymbetov birneshe usynys aitty:
Otandyq tsifrlyq taksi platformalaryn qurý,
Qazaqstannyń tsifrlyq kartasyn ázirleý – bul naryq úshin infraqurylymdyq mańyzdy sheshim,
Iri agregatorlardyń komissiia mólsherine shekteý qoiý – ony 3-5 paiyz deńgeiine deiin túsirý,
Taksi, azamattyq aviatsiia jáne temirjol jolaýshylar tasymaly salalarynda dinamikalyq baǵa qalyptastyrýdy retteý, sebebi bul salalarda negizgi shyǵyndar ózgermeidi, tek suranys aýytqidy.
– Naryqta turaqty monopoliia qalyptasqan jaǵdaida, iri agregatorlardyń komissiiasyn retteýge baǵyttalǵan baǵa saiasatyn engizý qajet, – dedi Jaiymbetov.
