ءماجىلىس دەپۋتاتى مارحابات جايىمبەتوۆ شەتەلدىك تاكسي اگرەگاتورلارىنا قويىلاتىن تالاپتاردى قايتا قاراۋ قاجەت ەكەنىن مالىمدەدى، دەپ حابارلايدى Dalanews.kz.
ونىڭ ايتۋىنشا، ساندىق پلاتفورمالاردىڭ قارقىندى دامۋى سالدارىنان ەلىمىزدە اۆتوۆوكزالداردىڭ ماڭىزى جويىلىپ، قالاارالىق تاسىمال كولەمى قىسقارىپ جاتىر، ال تاكسوپاركتەر ىرىلەنىپ نەمەسە مۇلدە جابىلىپ جاتىر.
– قازاقستانداعى جۇزدەگەن مىڭ جۇرگىزۋشى تاكسي اگرەگاتورلارىنا قاتتى تاۋەلدى بولىپ قالدى. ءاربىر تاپسىرىستان وتاندىق جۇرگىزۋشىگە نەبارى از عانا تابىس قالادى، قالعانى شەتەلگە كەتەدى. ءبىزدىڭ كۇندەلىكتى ومىرىمىزگە تەرەڭ ەنگەن بۇل سەرۆيستەردىڭ بەلگىلى ءبىر ۇلەسى ەلىمىزدىڭ ىشكى قارجى اينالىمىنان تىس قالىپ وتىر. ءبىز ولارعا تاۋەلدى بولا وتىرىپ، ىشكى ەكونوميكامىزعا ەلەۋلى شىعىن كەلتىرىپ وتىرمىز، – دەدى جايىمبەتوۆ دەپۋتاتتىق ساۋالىندا.
دەپۋتاتتىڭ مالىمەتىنشە، سيفرلىق تاكسي پلاتفورمالارى جۇرگىزۋشىدەن 16 پايىزعا دەيىن كوميسسيا ۇستايدى، وعان تاكسوپاركتەر قوسىمشا 2-4 پايىز قوسادى. سونىڭ سالدارىنان جۇرگىزۋشىنىڭ نەگىزگى تابىسى كوميسسياعا كەتىپ، لايىقتى اقشا تابۋعا مۇمكىندىك قالمايدى.
– شەتەلدىك پلاتفورمالار نارىقتاعى ۇلەسىن ءتيىمدى پايدالانىپ، ۇستەم جاعدايعا يە بولىپ وتىر. ال وتاندىق قوسىمشالار قولداۋدىڭ ازدىعىنان باسەكەگە توتەپ بەرە المايدى. باسەكەنىڭ جوقتىعى تۇتىنۋشىلار تاڭداۋىن شەكتەيدى، ساپا مەن باعا ماسەلەلەرى شەشىلمەي قالادى.
ازاماتتار جەكە قابىلداۋ كەزىندە تاكسي ءتاريفىنىڭ نەگىزسىز وسۋىنە شاعىمدانىپ ءجۇر. اسىرەسە مەرەكە كۇندەرى نەمەسە اۋا رايى كۇرت وزگەرگەندە باعالار بىردەن شارىقتاپ كەتەدى. وسىلايشا شەتەلدىك پلاتفورمالار جۇرگىزۋشىلەر مەن جولاۋشىلاردىڭ قارجىسىن قوسا العاندا، ونداعان ميلليارد تەڭگەنى ەل ەكونوميكاسىنان شىعارىپ وتىر، – دەدى دەپۋتات.
ۇلتتىق قاۋىپسىزدىككە ءقاۋىپ
دەپۋتاتتىڭ ايتۋىنشا، بۇل جاعداي ەلدىڭ ۇلتتىق جانە ەكونوميكالىق قاۋىپسىزدىگىنە تىكەلەي ءقاۋىپ توندىرەدى. سونىمەن قاتار، نارىقتاعى مونوپوليالىق جاعداي بۇل پلاتفورمالارعا تابىستى ەشقانداي باقىلاۋسىز ۇلعايتۋعا مۇمكىندىك بەرىپ وتىر.
ۇسىنىستار
جاعدايدى تۇزەتۋ ءۇشىن جايىمبەتوۆ بىرنەشە ۇسىنىس ايتتى:
وتاندىق سيفرلىق تاكسي پلاتفورمالارىن قۇرۋ،
قازاقستاننىڭ سيفرلىق كارتاسىن ازىرلەۋ – بۇل نارىق ءۇشىن ينفراقۇرىلىمدىق ماڭىزدى شەشىم،
ءىرى اگرەگاتورلاردىڭ كوميسسيا مولشەرىنە شەكتەۋ قويۋ – ونى 3-5 پايىز دەڭگەيىنە دەيىن ءتۇسىرۋ،
تاكسي، ازاماتتىق اۆياسيا جانە تەمىرجول جولاۋشىلار تاسىمالى سالالارىندا ديناميكالىق باعا قالىپتاستىرۋدى رەتتەۋ، سەبەبى بۇل سالالاردا نەگىزگى شىعىندار وزگەرمەيدى، تەك سۇرانىس اۋىتقيدى.
– نارىقتا تۇراقتى مونوپوليا قالىپتاسقان جاعدايدا، ءىرى اگرەگاتورلاردىڭ كوميسسياسىن رەتتەۋگە باعىتتالعان باعا ساياساتىن ەنگىزۋ قاجەت، – دەدى جايىمبەتوۆ.
