Sý resýrstary mınıstri Nurjan Nurjigitov 2026 jylǵa arnalǵan sý paıdalaný lımıtteri bekitilgenin málimdedi. Shekteýler Túrkistan, Qyzylorda, Almaty, Jetisý jáne Jambyl oblystaryna qatysty engizildi, dep habarlaıdy Dalanews.kz.

Mundaı sheshim 2025 jylǵy qýańshylyq saldary men Syrdarıa jáne Talas ózenderi baseınderinde sý azaıýy múmkin degen boljamdarǵa baılanysty qabyldanǵan.

Bekitilgen lımıtterge sáıkes, Túrkistan oblysyna - 3,8 km³, Qyzylorda oblysyna - 3,2 km³, Almaty oblysyna - 2,1 km³, Jetisý oblysyna - 1,8 km³, al Jambyl oblysyna - 1,2 km³ sý kólemi bólindi.

Mınıstrlik negizgi táýekelderdiń biri retinde Toqtoǵul sý qoımasyndaǵy jaǵdaıdy atap ótti. Qazir ondaǵy sý qory ótken jylmen salystyrǵanda 1,5 km³-ge az. Maýsym basynda qoıma sý jınaý rejımine ótedi dep kútilýde. Bul Maqtaaral men Jetisaı aýdandaryna sý jetkizýge áser etýi múmkin.

Sondaı-aq jaz aılarynda ózen aǵyny qalypty deńgeıden tómen bolady degen boljam bar. Osyǵan baılanysty ákimdikterge, ásirese kúrish egisin josparlaý kezinde, belgilengen lımıtterdi qatań saqtaý tapsyryldy.

Qýań kezeńdegi shyǵyndy azaıtý úshin mınıstrlik Talsim-NG sıfrlyq boljaý modeline kóship jatyr.