Energetika ministrligi uiymdastyrǵan sońǵy onlain aýktsionda munai men gaz qoryna bai 6 ken ornynyń beseýin Qytai men Singapýrdan kelgen investorlar satyp alǵan dep jazady DALA INSIDE telegram arnasy.
Saýda barysynda eń joǵary baǵany Sozak Oil & Gas kompaniiasy usynǵan. Geobarlaýmen ainalysatyn kompaniia Ulytaý oblysyndaǵy bastapqy baǵasy 73 million teńgege baǵalanǵan Bestaqyr ýchaskisi úshin 23,4 milliard teńge (shamamen $45 million) kóleminde ótinim bergen.
Kompaniia Qazaqstanda tirkelgenimen, negizgi aktsioneri Niderlandta tirkelgen Sino-Science Petroleum kompaniiasy. Sońǵy iesi qytailyq Hýei Lin dep tur. Aýktsion shartyna sai 17 jeltoqsanǵa deiin kelisilgen somany tolyq tólese Sozak Oil-ǵa osy aýmaqta munai men gazdy barlaý jáne óndirý quqyǵy beriledi.
Bestaqyrdyń aýmaǵy 4700 sharshy shaqyrymnan asyp jyǵylady. Ázirge munda iri ken oryndary tabylǵan joq, degenmen dál irgesindegi Qumkóldyń munai qory shamamen 1 milliard barrelge baǵalanyp otyr.
Qumkóldi qazir Turgai Petroleum jáne PetroKazakhstan Kumkol Resources birlesip igerýde. Ekeýi de Qytaidyń ulttyq munai-gaz korporatsiiasymen qoiyn-qoltyqtasyp jumys isteidi.
Aýktsiondaǵy ekinshi eń joǵary ótinimdi Kazakhstan Zhonghengyongsheng Energy kompaniiasy bergen. Olar Atyraýdaǵy 1977 jyly ashylǵan Kulsary ýchaskisi úshin 2,6 milliard teńge usynǵan. Kompaniia Singapýrda tirkelgen Weiye Trading-ke tiesili.
Úshinshi oryndy Pro Explore Mining Company túiindegen. Olar Atyraý oblysyndaǵy Qiǵash aýmaǵyn satyp alý úshin 1,7 milliard teńge usynypty. Bul kompaniianyń túp iesi de qytai biznesmeni.
"Kompaniia Qazaqstanda eki-úsh ai buryn ǵana tirkelgen. Buǵan qarap "bular arnaiy osy aýktsionǵa qatysý úshin qurylǵan ba?" degen oiǵa qalasyń. Qalǵan úsh ýchaski de Qytai men Singapýrdan kelgen investorlardyń baqylaýyna ótken. Astana Guangming Mining men HarmonyOre Mining Company Qytaidan kelgen investorlarmen tyǵyz bailanysty. Bylaisha aitqanda, bulardyń artynda sheteldik kapital tur.
Aýktsionnyń erekshe nazar aýdarar tusy kei kompaniialardyń kúni keshe ǵana tirkelip, qysqa merzimde strategiialyq aktivterge qol jetkizgeni. Aitalyq, qyrkúiekte tirkelgen kompaniianyń iri jer telimderin ielenýi aýktsionnyń ádiletti ótkenine kúmán týǵyzady", - dep paiymdaidy DALA INSIDE.
