Is-sharaǵa belgili aqyndar men jazýshylar, mádeniet qairatkerleri qatysty.
– Ádebiet – ulttyń jany. Ol árdaiym halyqpen birge úzdiksiz damyp otyrady. Shyǵarmashyl tulǵanyń qalamynan qashalyp shyqqan týyndy qai kezde de álemdik kontekstegi ulttyń ereksheligin tanytatyny sózsiz.
Hákim Abai, Muhtar Áýezov, Qasym Amanjolov, Jumeken Nájimedenov, Muqaǵali Maqataev syndy ádebiet alyptarynyń shyǵarmalary óz ýaqytynyń kórkemdik kókjiegin keńeitti. Rýhaniiattyń osynaý uly kóshi óz saparyn toqtatpai, keshe men búgindi, búgin men erteńdi jalǵap keledi. Sondyqtan biz árdaiym jas qalamgerler shyǵarmashylyǵyn airyqsha nazarda ustaimyz, – dep atap ótti ministr.
Sondai-aq, ministr memleket tarapynan elimizdiń aqyn-jazýshylarynyń týyndylaryn basyp shyǵarý arqyly olarǵa belsendi túrde qoldaý kórsetetinin aitty.
Jyl saiyn qoǵamdyq mańyzy bar kitaptardy satyp alý, basyp shyǵarý jáne taratý baǵdarlamasy boiynsha qalamgerlerdiń kitaptary jaryq kóredi.
Sońǵy eki jyl ishinde úsh júzden astam jańa týyndy tól ádebietimizdiń qoryn tolyqtyrdy. El mádenietiniń damýyna qosylǵan qundy úles dep tanylǵan ádebiet pen óner salasyndaǵy úzdik shyǵarmalar úshin Abai atyndaǵy Memlekettik syilyq pen «Aiboz» ulttyq ádebi syilyǵy beriledi.
2023 jyly jas qalamgerlerge memlekettik qoldaý kórsetý, daryndy aqyn-jazýshylardyń jańa býynyn qalyptastyrý maqsatynda tuńǵysh ret Prezidenttik arnaýly ádebi syilyq taǵaiyndaldy. Ádebi syilyq 18-35 jasqa deiingi qalamgerlerge arnalǵan.
Avtorlar buǵan deiin halyqaralyq jáne ulttyq baiqaýlarǵa qatyspaǵan óz shyǵarmalaryn usynyp, barlyǵy 53 ótinim qabyldandy. Onyń ishinde «Balalar ádebieti» nominatsiiasyna – 17, «Dramatýrgiia» nominatsiiasyna – 9, «Poeziia» nominatsiiasyna – 13, «Proza» nominatsiiasyna – 14 úmitker bar.
Ótinimderdiń barlyǵy jiti qaralyp, shyǵarmanyń kórkemdik deńgeii arnaiy saraptamadan ótti.
Ministr «Qazaqstannyń jas jazýshylary men aqyndaryna arnalǵan Prezidenttik arnaýly ádebi syilyqtyń laýreaty» ataǵynyń iegerlerine arnaiy diplomdar men tósbelgiler jáne aqshalai syilyqtar tabys etti.
«Proza» nominatsiiasy boiynsha Jylqybai Doshannyń «Kvant» týyndysy, «Poeziia» nominatsiiasy boiynsha Edilbek Dúisenovtiń «Qalalyq qustar» óleńder toptamasy, «Dramatýrgiia» nominatsiiasy boiynsha Aitolkyn Ashimovanyń «Taý kótergen Tolaǵai» dramalyq týyndysy, «Balalar ádebieti» nominatsiiasy boiynsha Oljas Qasymnyń «Atyń ozsyn, azamat!» toptamasy júldeli orynǵa ie boldy.
