«Qazaqstannyń jańa esimi» baiqaýyndaǵy daýys berý kezinde burmalaýshylyqtar anyqtaldy
«Qazaqstannyń 100 jańa esimi» jobasyna úmitkerler úshin daýys berý 25 naýryz ben 12 sáýir aralyǵynda https://100janaesim.ruh.kz portalynda ótti. Monitoring barysynda belgili bir úmitkerlerge qysqa ýaqyt ishinde kóp daýys berilgeni anyqtalǵan.
Máselen, daýystardy burmalaý tásilderiniń biri https://profitcentr.com, https://socpublic.com, https://qcomment.ru, https://golospobed.ru jáne t.b. (skrinshottardyń kóshirmeleri qosa beriledi) mamandandyrylǵan portaldarda aqyly negizde daýys berý týraly ótinish boldy. Saittyń log-failynda derbes poshtaǵa jatpaityn túrli elektrondyq meken-jailardan daýystardyń kóp kólemdegi kúdikti aǵymy kórsetilgen, mysaly zywmd@list.ru, w7a5u45cjfzw8fz@bk.ru jáne t.b.
Quqyq buzýshylyqtar nemese ózge burmalaýshylyqtar, onyń ishinde onlain-daýys berý kezinde daýystardy buraý anyqtalǵan jaǵdaida, uiymdastyrýshylar qatysýshyny jobadan shyǵarý quqyǵyn paidalanady. Osyǵan bailanysty jobaǵa qatysýǵa ótinim bergen birqatar úmitker shyǵaryldy.
«Qazaqstannyń 100 jańa esimi» jobasy «Rýhani jańǵyrý» baǵdarlamasy aiasynda júzege asyrylyp jatqany belgili. Joba zamanaýi Qazaqstandy beinelegen tabysty adamdardyń tarihyn, olardyń túrli salalardaǵy jetistikterin kórsetedi.
Baiqaý 2017 jyldan beri ótkizilip keledi, biyl 4-shi maýsym aiaqtalady. 2021 jyly qatysýǵa 2790 qazaqstandyq ótinim berdi. Daýys berý kezinde eń kóp upai jinaǵan jáne kórnekti qoǵam qairatkerlerinen, mádeniet, sport ókilderinen jáne kásipkerlerden turatyn bedeldi qazylar alqasy iriktegen qatysýshylar jobanyń jeńimpazdary bolady. 2021 jyly qazylar alqasynyń quramynda jobanyń ótken jyldardaǵy jeńimpazdary da bar.
