Belgili kinorejisser, stsenarist, Qazaqstannyń eńbek sińirgen qairatkeri Slambek Táýekel 78 jasqa qaraǵan shaǵynda dúnieden ozdy. Qaraly habarmen Qazaqstan Respýblikasynyń Mádeniet jáne aqparat ministrliginiń baspasóz qyzmeti bólisti, dep habarlaidy Dalanews.kz.
Ministrlik belgili kinorejisser, stsenarist, Qazaqstannyń eńbek sińirgen qairatkeri, "Qurmet" jáne "Qurmet belgisi" ordenderiniń iegeri Slambek Tileýqabyluly Táýekeldiń dúnieden ozýyna bailanysty otbasy men týǵan-týystaryna, barsha áriptesterine qaiǵyra kóńil aitady.
"Slambek Tileýqabyluly – qazaq kinoóneriniń damýyna eleýli úles qosqan kórnekti tulǵa. Tarihi-kórkem filmderdiń birqataryn dúniege ákelgen kásibi rejisser, bilikti stsenarist ári prodiýser retinde ulttyq rýhaniiattyń órkendeýine eńbek sińirgen óner qairatkeri. Sonymen qatar Qazaq ulttyq óner ýniversitetinde uzaq jyldar ustazdyq qyzmet atqaryp, jas mamandardyń tárbiesine de zor úles qosty. Otandyq kino tarihynda, óner men mádeniet shejiresinde jarqyn iz qaldyrǵan ardaqty azamattyń ǵibratty ǵumyry halqynyń jadynda máńgilik saqtalady. Marqumnyń jatqan jeri jaily, topyraǵy torqa bolsyn! Allanyń raqymy men meiirimi joldas bolyp, rýhy peiishte shalqysyn!", delingen kóńil aitý habarlamasynda.
Aita ketsek, Slambek Tileýqabyluly Táýekel - "Shuǵyla" mýltiplikatsiialyq filmi stsenariiiniń (1975); 200-ge jýyq maqala men jariialanymnyń avtory, 1948 jyly 2 sáýirde Pavlodar oblysynda dúniege kelgen.
- 1971 jyly "Qazaqfilm" kinostýdiiasy direktorynyń orynbasary, direktory.
- 1973 jyldan bastap QR Memkino tóraǵasynyń orynbasary; sonymen qatar QR Memlekettik mádeniet pen ónerdi qoldaý qorynyń atqarýshy direktory.
- 1991 jyldan beri Sháken Aimanov atyndaǵy "Qazaqfilm" respýblikalyq shyǵarmashylyq-óndiristik birlestiginiń rejisseri.
- 2001 jyldan bastap "Qazaqstan" respýblikalyq telearnasy basqarma tóraǵasynyń orynbasary.
- 2004 jyly - QR Mádeniet, aqparat jáne sport ministrligi aqparat jáne muraǵattar komitetiniń tóraǵasy.
- 2006 jyldan beri Sh. Aimanov atyndaǵy "Qazaqfilm" AQ bas redaktory, oiyn filmderiniń qoiýshy rejisseri bolǵan.
"Batyr Baian" (1993), "Mahambet" (2008), "Atajurt" (2010) kinofilmderiniń qoiýshy-rejisseri. "Armysyń, Naýryz!", (1991), "Joǵalǵan ólke" (1992), "Kiiz úi gimni" (1991), "Naýryz" (1997),"Asanáli" (1998),"Bir bala" (2004) jáne taǵy basqa derekti filmderdiń rejisseri.
Qazaqstan Kinematografister odaǵynyń múshesi, hatshysy.
