«Zerendi-Astyq» JShS jáne onyń investory – «Qazaqstan astyq konsortsiýmy» JShS basshylary baspasóz májilisinde biylǵy egin naýqanynyń barysy jaiynda baiandap, jýrnalisterdiń saýaldaryna jaýap berdi.
«Qazaqstan astyq konsortsiýmy» JShS bas direktory Baqtiiar Ospanovtyń aitýynsha, biyl «Zerendi-Astyq» JShS mol ónim berip, konsortsiým seriktestikke investor bolyp kelgennen bergi rekordty kórsetkishke ie bolǵan. Qazirgi tańda kompaniia paishylarǵa tólemaqy berý jumystary bastaldy. Aita ketý kerek, Qazaqstan astyq konsortsiýmyna kiretin sharýashylyqtar arasynda «Zerendi-Astyq» JShS alǵashqy bolyp pai boiynsha tólemaqy berip jatyr.
«Qazaqstan astyq konsortsiýmy 2021 jyly «Zerendi-Astyq» seriktestigine onyń qaryzdaryn ótep, jumysty jolǵa qoiý maqsatynda kelgen bolatyn. Burynǵy aktsionerdiń kezinde kompaniia quldyrap, onyń túrli bankte qaryzdary bar boldy.
«Zerendi-astyqtyń» ózi Problemalyq kreditter qoryna kepilge berilgen. Kompaniia bankrot bolýdyń aldynda ǵana turǵan edi. Biz investor retinde kelý arqyly arqyly kepilde turǵan jerlerdiń satylyp ketýiniń aldyn aldyq. Árine, memleket bizge kompaniianyń barlyq qaryzyn óteý mindetin qoidy. Qazir bul máseleni birtindep sheship jatyrmyz», – dedi Baqtiiar Ospanov
Alaida, onyń túsindirýinshe, «Zerendi-Astyq» JShS quramyna kiretin paishylardyń zańsyz jolmen hattama jasaý arqyly seriktestikten shyǵýy kompaniianyń damýyna úlken kedergi keltirip otyr. Buryn 36 myń gektar jerge ie bolǵan seriktestik búginde 18 myńǵa jýyq gektardan aiyrylǵan. Bul jerlerdiń ieleri basqa kompaniialarǵa ótip ketken.
«Biz bul turǵyda investor retinde óte qiyn jaǵdaida qalyp otyrmyz. Óitkeni, biz burynǵy aktsionerdiń qaryzy tolyq óteý mindetin moinymyzǵa aldyq, alaida egin egetin jer kólemi aitarlyqtai azaiyp ketti. Qazir seriktestik pen paishylar arasynda uzaqqa sozylǵan sot protsesi júrip jatyr. Atalǵan hattamalardyń jalǵan ekenin rastaityn sot sheshimderi shyqty. Degenmen, qazir bizge shartty túrde paishylarmen beibit kelisimge kelý úshin ýaqyt berilip otyr. Osyǵan orai, biz paishylardy seriktestikke qaita oralýǵa, birge jumys isteýge, sáikesinshe dividendterin alýǵa shaqyramyz», – dedi Baqtiiar Ospanov.
«Zerendi-Astyq» JShS málimetinshe, seriktestik quramynan shyǵyp ketken shamamen 70 paishy 2023 jyly qaita oralǵan. Qazirgi tańda taǵy 30-dan astam paishy qaita seriktestik quramyna ótý boiynsha daiyndyq jumystaryn júrgizip jatyr.
«Qazaqstan astyq konsortsiýmy» JShS bas direktory Baqtiiar Ospanov bul rette paishylarǵa tólenetin dividend mólsheri de ulǵaiǵanyn eske saldy. Eger «Qazeksportastyq» kompaniiasy investor bolǵan tusta paishylar ónimniń 5 paiyzy mólsherinde tólemaqy alsa, búginde ol 7,5 paiyzdy quraidy.
Quramyna 23 sharýashylyq kiretin Qazaqstan astyq konsortsiýmy basshysy kompaniianyń áleýmettik jaýapkershilik jáne kompaniiany tehnikalyq jaraqtandyrý baǵytyndaǵy jumystar týraly da baiandady. Kompaniia biyl 43 jańa kombain (10-y – importtyq ónim) satyp alsa, 2025 jylǵy kóktemde aýyl sharýashylyǵy tehnikalarynyń qatary 32 egin egý keshenimen tolyǵady. Kompaniia áleýmettik jaýapkershilik aiasynda jyl saiyn aýyldar arasyndaǵy joldy qardan tazalaý jumystaryn óz kúshimen júzege asyrady. Sondai-aq, «Zerendi-Astyq» JShS paishylary turatyn, eńbek etetin aýyldarda mádeniet úiin, meditsinalyq pýnktin jóndeý jumystaryn júzege asyryp jatyr.
«Ókinishke qarai, biylǵa deiin «Zerendi-Astyq» JShS kórsetkishteri tómen boldy. Oǵan qosa, paishylardyń seriktestikten ketýi kompaniianyń joǵary damýyna múmkindik bermei keldi. Soǵan qaramastan, kompaniia áleýmettik jaýapkershilik aiasyndaǵy óz mindettemelerin oryndap keledi. Biz tek tórtinshi jyl degende seriktestik tabysqa shyǵady dep boljap otyrmyz. Tabystyń artýyna qarai oblysta áleýmettik baǵyttaǵy jumystardy kóbirek oryndaýǵa kúsh salamyz», – dedi Baqtiiar Ospanov.
