Mamyr aiynda Óskemen qalasynda jihaz biznesiniń atyn jamylyp, sintetikalyq esirtki óndirisin jolǵa qoiǵan jergilikti turǵyn ustaldy. Ol qoimany jalǵa alyp, jabdyqtar men himiialyq zattar ákelgen. Ustaý kezinde 1,5 kg jýyq daiyn esirtki, bir jarym tonna prekýrsor, sondai-aq zerthanalyq jáne býyp-túiýge arnalǵan jabdyqtar tárkilendi.
Tekserýden keiin onyń Qostanai, Petropavl qalalary jáne Almaty oblysyndaǵy uqsas zerthanalarmen bailanysy bar ekeni anyqtaldy. Politsiia qyzmetkerleri qylmyskerlerdiń qozǵalys marshrýty jáne kún tártibin baqylaýda ustady. Osylaisha politseiler bir mezette birqatar óńirde operatsiia júrgizdi.
Rýdnyi qalasynda jaldamaly úidiń monshasyn zerthana etip jabdyqtaǵan eki adam ustaldy. 300 gramnan asatyn daiyn esirtki, himiialyq zattar, qorǵanysh kostiýmder jáne jabdyqtar tárkilendi. Olardyń kólikterinen satýǵa daiyn esirtki tabyldy. Almaty oblysynda mefedron óndirisimen ainalysqan taǵy eki kúdikti ustaldy. Óndiristiń sońǵy satysyndaǵy esirtki, prekýrsorlar jáne jabdyqtar tárkilendi. Tergeý kezinde ustalǵandar esirtki jasyrylǵan on jerdi kórsetip, jalpy salmaǵy shamamen 3 kg asatyn esirtki anyqtaldy.
"Jalpy qala kóshelerine sintetikalyq esirtkiniń 11 myńǵa jýyq dozasynyń taralýyna tosqaýyl qoiyldy. Qabyldanǵan sharalardyń nátijesinde 6 kg astam sintetika zańsyz ainalymǵa jiberilmedi, 4 tonnaǵa jýyq prekýrsor tárkilendi. IIM qoǵam qaýipsizdigine beijai qaramaityn azamattarǵa alǵys bildiredi jáne quqyqtyq tártipti qamtamasyz etýdi jalǵastyratyn bolady. Birlesip qana biz qalalardy qaýipsiz etip, balalardy esirtki qaýpinen qorǵai alamyz", – dedi departament bastyǵy – IIM resmi ókili Shyńǵys Alekeshev.
