Eńbek jáne halyqty áleýmettik qorǵaý ministrligi jyl basynan beri tarihi otanyna oralǵan etnikalyq qazaqtar týraly málimetti jariialady, dep habarlaidy Dalanews.kz.
2024 jylǵy 1 aqpandaǵy jaǵdai boiynsha 1 306 etnikalyq qazaq tarihi otanymen tabysyp, qandas mártebesin aldy. Jalpy 1991 jyldan beri respýblikaǵa 1 mln 129,6 myń etnikalyq qazaq oraldy.
"Jyl basynan bastap Qazaqstanǵa kelgen qandastardyń jartysy (48,9%) Qytaidan, 29,6% – Ózbekstannan, 8,3% – Mońǵoliiadan, 4,4% – Reseiden, 7,3 Túrikmenstannan jáne 1,5% basqa elderden", - delingen vedomstvonyń hbarlamasynda.
Osy jylǵy 1 aqpandaǵy jaǵdai boiynsha eńbekke qabiletti jastaǵy etnikalyq qonys aýdarýshylar sany 56,2%-dy, eńbekke qabiletti jastan kishi 33,6%-dy jáne zeinetkerler 10,2%-dy quraidy.
Eńbekke qabiletti jastaǵy qandastardyń ishinen bilim deńgeii boiynsha 15%-y joǵary bilimdi, 20,2%-y orta kásibi bilimdi, 54,6%-y jalpy orta bilimdi, jáne 10,2%-ynyń bilimi joq.
Qonys aýdarǵan etnikalyq qazaqtar respýblikanyń túrli óńirlerine qonystandy.
Sonymen birge qandastardy qonystandyrý úshin kelesidei eńbek kúshi tapshy óńirler anyqtaldy: Aqmola, Abai, Qostanai, Pavlodar, Shyǵys jáne Soltústik Qazaqstan oblystary.
Qonystandyrý óńirlerinde 2023 jylǵa arnalǵan qandastardy qabyldaý kvotasy 2 433 adamdy quraidy. 2023 jylǵy 1 aqpandaǵy jaǵdai boiynsha qonystandyrý óńirlerine 332 qandas qonys aýdardy.
"Joǵaryda atalǵan óńirlerde qonystanǵan qandastarǵa kóshýge sýbsidiia túrinde memlekettik qoldaý sharalary usynylady – bir mezgilde otaǵasyna jáne otbasynyń árbir múshesine 70 AEK (258,4 myń teńge) mólsherinde; turǵyn úi jaldaýǵa jáne kommýnaldyq qyzmetterge aqy tóleýge – bir jyl ishinde 15-ten 30 AEK (55,3-den 110,7 myń teńgege deiin) mólsherinde beriledi", - dep habarlady ministrlik.
Jyl basynan beri 35 qandasqa túrli qoldaý sharalary kórsetilip, turaqty jumysqa ornalastyryldy.
Sonymen qatar erikti qonys aýdarýdyń tiimdiligin arttyrý maqsatynda azamattardy soltústik óńirlerge qonys aýdarýǵa qatysatyn jumys berýshilerdi qoldaý boiynsha institýtsionaldyq sharalar qabyldandy. Turǵyn úi satyp alý, salý úshin nemese ipotekalyq turǵyn úi qaryzdary boiynsha bastapqy jarnanyń bir bóligin jabý úshin ekonomikalyq utqyrlyq sertifikaty turǵyn úi qunynyń 50%-y nemese bir otbasyna 4,28 mln teńgege deiin mólsherinde birjolǵy óteýsiz jáne qaitarymsyz negizde engizildi.
