Qazaqstandyqtardyń bolashaqqa senimi bekem – saýalnama nátijeleri

DATAmetrics kompaniiasy halyqtyń áleýmettik kóńil-kúiin sipattaityn áleýmettanýlyq zertteý nátijelerin usynady. Bul derekter azamattardyń ómir sapasyna bergen baǵasyn, otbasynyń materialdyq jaǵdaiyndaǵy ózgerister men bolashaqqa degen degen senim deńgeiin qamtyǵan. Bul málimetter Qazaqstan Respýblikasynyń Prezidenti janyndaǵy Qazaqstannyń strategiialyq zertteýler institýtynyń tapsyrysy boiynsha 2026 jylǵy 13 maýsym men 2 shilde aralyǵynda júrgizilgen áleýmettanýlyq zertteýdiń nátijesinde anyqtaldy, dep habarlaidy dalanews.kz.

Betpe-bet suhbat («face-to-face») ádisimen júrgizilgen saýalnamaǵa Qazaqstannyń barlyq óńirlerinen, sondai-aq Astana, Almaty jáne Shymkent qalalarynan 18 jastan asqan 8000 turǵyn qatysty.

Halyqtyń áleýmettik kóńil-kúii adamdardyń óz ómirine, materialdyq jaǵdaiyna jáne bolashaqqa degen senim deńgeiine qandai baǵa beretini arqyly anyqtalady. Zertteý nátijeleri osy kórsetkishterdiń barlyǵy boiynsha respondentterdiń jaýaptarynda oń kózqaras basym ekenin kórsetti.

Eń joǵary kórsetkish ómirge rizalyq deńgeii boiynsha tirkelgen. Saýalnamaǵa qatysýshylardyń 63,3%-y óz ómirine tolyq riza ekenin aitsa, taǵy 31,9%-y kóp jaǵdaida qanaǵat bildiredi. Osylaisha, respondentterdiń 95,2%-y óz ómirine oń baǵa beredi. Al 3,4%-y óz ómirine onsha riza emestigin, 1,1%-y múlde riza emestigin málimdedi.

Óz ómirine berilgen oń baǵa otbasynyń materialdyq jaǵdaiyn qabyldaý deńgeiinen de kórinis tabady. Zertteýge qatysýshylardyń úshten ekisinen kóbi (67,6%) otbasylarynyń materialdyq jaǵdaiy sońǵy jylda jaqsarǵanyn aitqan. Onyń ishinde 29,8%-y jaǵdaiy aitarlyqtai jaqsarǵanyn, al 37,8%-y belgili bir deńgeide jaqsarǵanyn atap ótti.

Respondentterdiń 25,5%-y otbasynyń materialdyq jaǵdaiy ózgermegenin aitsa, 6,6%-y nasharlai tústi dep sanaidy.

Azamattardyń búgingi kúnge bergen baǵasy bolashaqqa degen úmit deńgeiine áser etedi. Zertteýdiń qorytyndylary boiynsha, saýalnamaǵa qatysqandardyń basym bóligi óz otbasynyń keleshegine senimmen qaraidy. Mysaly, on respondenttiń shamamen segizi (78,6%) bir jyldan keiin búgingi kúnnen jaqsyraq ómir súretinine senedi. Onyń ishinde 45,0%-y óz jaǵdaiy aitarlyqtai jaqsarady dep úmittense, taǵy 33,6%-y belgili bir deńgeide jaqsaratynyna úmitti.

Sondai-aq 15,9%-y óz otbasynyń turmys deńgeii ózgerissiz qalady dep esepteidi. Al, respondentterdiń 3,4%-y óz jaǵdaiy nasharlaýy múmkin dep sanaitynyn aitqan.

Jalpy alǵanda, zertteý nátijeleri halyqtyń áleýmettik kóńil-kúiiniń negizgi kórsetkishteri boiynsha oń baǵalaýdyń basym ekenin kórsetedi. Saýalnamaǵa qatysqandardyń kópshiligi óz ómirine riza, otbasynyń materialdyq jaǵdaiyndaǵy ózgeristerdi oń baǵalaidy jáne aldaǵy ýaqytta turmys jaǵdaiynyń jaqsaratynyna senim bildiredi.
 
Irikteý Qazaqstan Respýblikasy halqynyń negizgi áleýmettik-demografiialyq sipattamalaryna, atap aitqanda turǵylyqty jeriniń túrine (qala/aýyl), jynysy men jasyna qarai reprezentativti. Senimdilik yqtimaldyǵy 95% bolǵan jaǵdaida iriktemeniń statistikalyq qatelik shegi ±1,1%-dan quraidy.

DATAmetrics kompaniiasy bul zertteý nátijelerin Qazaqstan Respýblikasy Ortalyq sailaý komissiiasynyń 2026 jylǵy 3 shildedegi № OSK-11-07/ZT-K-29 habarlamasy negizinde jariialap otyr.