Qazaqstandyq júrgizýshiler jeke kýálik, júrgizýshi kýáligi jáne kólik quralyn tirkeý týraly kýálikti qaǵaz túrinde ózimen birge alyp júrmeýine bolady. Eger bul qujattar elektrondyq formatta usynylsa, olardyń zańdy kúshi qaǵaz nusqasymen teń sanalady, dep habarlaidy dalanews.kz.
IIM málimetinshe, Jol qozǵalysy qaǵidalaryna sáikes júrgizýshi ózimen birge qajetti qujattardy alyp júrýge jáne politsiia qyzmetkeriniń talaby boiynsha kórsetýge mindetti. Olardyń qatarynda jeke kýálik, júrgizýshi kýáligi, kólik quralyn tirkeý týraly kýálik, qajet bolǵan jaǵdaida jol paraǵy, tasymaldanatyn júkke qatysty qujattar jáne zańnamada kózdelgen ózge de qujattar bar.
Vedomstvo Qazaqstan azamattary men elimizde tirkelgen avtokólik quraldary úshin bul qujattardy elektrondyq formatta paidalanýǵa ruqsat berilgenin eske saldy.
"Zańnamaǵa sáikes jeke kýáliktiń qaǵaz jáne elektrondyq nusqalary teń dárejede tanylady. Sondyqtan jeke kýálik tsifrlyq formatta usynylǵan jaǵdaida, ony qaǵaz túrinde ózińizben birge alyp júrý mindetti emes", - dep túsindirdi IIM.
Sondai-aq ministrlik júrgizýshi eGov Mobile nemese kez kelgen banktiń mobildi qosymshasy arqyly jeke kýáligin, júrgizýshi kýáligin jáne kólik quralyn tirkeý týraly kýáligin kórsete alsa, bul qujattardyń qaǵaz nusqasyn ózimen birge alyp júrý talap etilmeitinin atap ótti.
Osylaisha, Qazaqstan azamattary úshin joǵaryda atalǵan negizgi júrgizýshi qujattaryn tsifrlyq formatta kórsetý zań talaptaryna tolyq sáikes keledi.
