Qazaqstan Respýblıkasy Jasandy ıntellekt jáne sıfrlyq damý mınıstriniń birinshi orynbasary Rostıslav Konáshkın qazaqstandyqtardyń jeke derekterin zańsyz jınaý jáne satý faktisi boıynsha qylmystyq is tergelip jatqanyn aıtty. Onyń sózinshe, tergeý jalǵasyp jatqandyqtan, ázirge istiń egjeı-tegjeıi jarıa etilmeıdi, dep habarlaıdy Dalanews.kz.

Jýrnalıser vıse-mınıstrden bul iske memlekettik organdar nemese HQKO qyzmetkerleriniń qatysy bar-joǵyn surady. 

"Men muny naqty HQKO qyzmetkerleri dep aıtpas edim. Halyqqa qyzmet kórsetý ortalyqtarynyń jumysyn úılestiretin vıse-mınıstr retinde aıtarym, aqparattyq júıelerdegi málimetterge qoljetimdilik ár paıdalanýshyǵa berilgen rólge sáıkes bólinedi. Eger naqty bir qoldanýshy zańdy buzsa nemese alynǵan aqparatty zańsyz paıdalansa, onda olarǵa qatysty tıisti quqyq qorǵaý sharalary júrgiziledi", – dedi Rostıslav Konáshkın Úkimettegi brıfıńte.

Rostıslav Konáshkın mınıstrlik qazirgi tańda jeke derekterdi qorǵaý talaptaryn kúsheıtý baǵytynda jumys júrgizip jatqanyn atap ótti.