Qazaqstandyqtardyń jartysynan astamy (51,1%) ChatGPT, Google Gemini, Midjourney jáne basqa da jasandy intellekt tehnologiialaryn qoldanady. Bul derekter QR Prezidenti janyndaǵy Qazaqstannyń strategiialyq zertteýler institýty tapsyrysymen júrgizilgen áleýmettanýlyq saýalnama nátijelerine negizdelgen, dep habarlaidy Dalanews.kz
JI-di eń belsendi qoldanatyndar bul jastar: 18–29 jas aralyǵyndaǵy respondentterdiń 76,2%-y jasandy intellekt servisterin paidalanady. 30-45 jasta bul kórsetkish 57,1%-ǵa deiin tómendeidi. Jas ulǵaiǵan saiyn tehnologiiany qoldaný deńgeii birtindep azaiady: 46–60 jas tobynda 37,5%, al 61 jastan asqan azamattar arasynda – 16,6%.
Jastar mundai tsifrlyq quraldardy kóbine oqý úrdisine jáne ózin-ózi damytý úshin (48,7%), sondai-aq mátindermen jumys isteýge (44,2%) paidalanady. Orta jastaǵy respondentterdiń negizgi suranystary da osy baǵyttarmen sáikes keledi: bilim alý jáne mátindik mindetter basty qajettilikterdiń qatarynda. Al 61 jastan asqan azamattar úshin jasandy intellekt servisteri kóbine aqparat izdeýdiń quralyna ainalǵan: bul toptyń 40,8%-y JI eń aldymen qarapaiym izdeý júiesi retinde qoldanady.
Genderlik jáne áleýmettik-demografiialyq aiyrmashylyqtar da aiqyn baiqalady. Áielder tsifrlyq servisterdi erlerge qaraǵanda jii qoldanady (54,6% jáne 46,6%). Sondai-aq qala turǵyndary aýyldyq jerlerge qaraǵanda jasandy intellektti belsendirek paidalanady: tiisinshe 53,2% jáne 47,9%. Bul aiyrmashylyq kóbine qalalardaǵy tsifrlyq infraqurylymnyń keńirek qoljetimdiligimen túsindiriledi.
Bilim deńgeii de tsifrlyq quraldardy qoldanýdaǵy mańyzdy faktorlardyń biri. Joǵary bilimdi respondentter (64,2%) men orta bilimdi azamattar (37,7%) arasyndaǵy alshaqtyq 1,7 esege deiin jetedi. Bul jańa tehnologiialardy meńgerý úshin bilim men daiyndyqtyń sheshýshi rólin kórsetedi. Sondai-aq bilim deńgeii men tsifrlyq quzyrettilik arasyndaǵy bailanys ta aiqyn kórinedi: bilim deńgeii joǵarylaǵan saiyn zamanaýi tehnologiialardy kúndelikti ómirge engizýge degen daiyndyq ta arta túsedi.
Eske salaiyq, áleýmettanýlyq saýalnama QSZI tapsyrysymen 2025 jylǵy 3 qazan men 5 qarasha aralyǵynda júrgizildi. Irikteme kólemi 8000 respondentti quraidy. Saýalnamaǵa 17 oblys pen 3 respýblikalyq mańyzy bar qala – Astana, Almaty jáne Shymkent qalalarynyń 18 jastan asqan respondentteri qatysty.
