2025 jyly qazaqstandyqtar aýyzsýdyń sapasyna, sý berýdegi úzilisterge jáne tozǵan sý jelilerine bailanysty 70 myń shaǵym joldaǵan. Bul týraly Premer-ministr Oljas Bektenov málimdedi, dep habarlaidy Dalanews.kz.
Úkimet basshysy óńir ákimdikteri merdiger jáne qyzmet kórsetýshi uiymdardyń jumysyna baqylaýdy kúsheitýi tiis ekenin atap ótti. Onyń aitýynsha, anyqtalǵan zańbuzýshylyqtar boiynsha qatań sharalar qabyldanýy qajet.
Sondai-aq Bektenov kommýnaldyq sektordy jańǵyrtýǵa arnalǵan Ulttyq joba aiasyndaǵy múmkindikterdi barynsha tiimdi paidalanýdy tapsyrdy. Atap aitqanda, birqatar óńirde sý qubyrlaryn qaita jańǵyrtý jáne paidalanýǵa berý jumystaryn jedeldetý, sý jobalaryn qarjylandyrýdy qamtamasyz etý jáne olardyń oryndalýyna júieli baqylaý ornatý qajettigin aitty.
