Jiynnyń shymyldyǵyn túrgen saiasattanýshy Edýard Poletaev búgingi tańda odaqtas elderdegi IJÓ niń jartysynan astamy qyzmet túrlerin quraitynyn atap ótti. Al mamandardyń pikirinshe aldaǵy jyldan bastap qyzmet kórsetýdiń ortaq naryǵy ekonomikanyń 40 paiyzyn qamtýy múmkin. Bul tarapta saiasattanýshy Nursultan Nazarbaevtyń sózin mysalǵa keltirdi. «2013 jyly qytailyq týristerdiń sany 100 mln. adamdy qurady. Olar týristik demalystaryna 102 mlrd. dollar jumsaǵan. Al aldaǵy jyldary bul kórsetkish eki esege óspek. Aitalyq, dál osy týristerdiń tym bolmaǵanda 1 paiyzyn nege ózimizge tartpasqa?» dedi Poletaev.
Al «Turan» ýniversitetiniń janyndaǵy týrizm ǵylymi zertteý institýtynyń direktory Vladimir Výkolov bul tarapta bizdiń el birinshi kezekte sporttyq týrizmdi damytýǵa basymdyq berýi kerektigin aitty.Onyń sózinshe, sheteldik týrister, onyń ishinde alpinister Jońǵar Alataýy men Tian Shan taýyna erekshe qyzyǵady. Ol sonymen qatar Qazaqstanǵa keletin týristiń qansha qarjy shyǵyndaitynyn da aityp berdi. «Bizge saparlap keletin sheteldikter 750 jáne 2000 dollardyń aralyǵynda qarjy shyǵyndaidy. Biz qazirgi kúni sporttyq týrizmdi damytýmyz kerek. Onyń barlyq múmkindigi bar» dedi óz sózinde Výkolov.
Óz kezeginde Almaty qalalyq Týrizm basqarmasynyń bas mamany Lolita Kim týrizm ózdigimen damymasyna basa nazar aýdardy. «Bar másele nede? Barlyǵy áýejaidan, qujat tekserýden bastalady. Bizge keletin týrister eń aldymen kóshelerdegi belgiler aǵylshynsha jazylmaitynyna, sol sebepti kóp jaǵdaida barar jerin anyqtai almai jataryna shaǵymdanady. Budan syrt qyzmet kórsetý sapasy tómen. Bylaisha aitqanda, bizdiń personaldyń sóilesý ádebi, mádenieti kelýshilerdi úrkitip jiberedi» dedi Kim.
Al kóp jyldar boiy Qazaqstannyń Frantsiiadaǵy konsýly qyzmetin atqarǵan Qazbek Beisebaev segiz jyl boiy týristik elderde jumys istegenin, bul tarapta bizdiń eldi Frantsiia nemese Shveitsariiamen salystyrýǵa kelmeitinin atap ótti. «3-4 jyl buryn Qazaqstanǵa jylyna 35 000 myń týrist keletin, olardyń 30 000 Almatyǵa keletin edi. Al qazirgi kúni olardyń sany 300 000 ósken. Biraq, bir qyzyǵy biz elimizde júrgen sheteldikterdiń barlyǵyn týrist retinde qarastyramyz. Bul durys emes. Shekara asyp, jumys babymen keletinder bizde kóp aialdamaidy» dedi ol óz sózinde.
Al Qazaqstan týrizm qaýymdastyǵynyń ókili Aleksei Hakimjanov Lolita Kimniń pikirine qoldaý bildirdi. «Aitalyq, sheteldik týrister kóbinese Kólsaiǵa barǵysy keledi. Biraq bizdegi joldyń sapasy, aǵylshyn tiliniń damymaǵany olardy oiynan ainytyp tastaidy» dedi Hakimjanov.
