Kókshetaý men Qaraǵandy oblysynda arnaiy baqylaýdaǵy dári-dármekterdi zańsyz satty degen kúdikpen 21 adam ustaldy, dep habarlaidy dalanews.kz.
Politsiia málimetinshe, kúdiktiler preparattardy Kókshetaý, Shýchinsk jáne Býrabai kýrorttyq aimaǵyna jetkizip, taratqan. Bir mezette júrgizilgen operatsiia kezinde 11 adam qolǵa tústi. Olardyń arasynda farmatsevtikalyq kompaniialardyń ieleri men qyzmetkerleri, kýrerler jáne ózge de tulǵalar bar.
Tintý barysynda 50 myńnan astam "Tropikamed" qutysy men soǵan uqsas 4 myńǵa jýyq dárilik zat tárkilendi. Sondai-aq qarý-jaraq, oq-dári, birneshe avtokólik jáne iri kólemdegi aqsha, onyń ishinde shetel valiýtasy tabyldy.
Osyndai operatsiia Qaraǵandy men Temirtaýda da júrgizildi. Bul qalalarda psihikaǵa áser etetin preparattardy zańsyz taratty degen kúdikpen taǵy 10 adam ustaldy.
Qazir atalǵan derekter boiynsha tergeý amaldary júrgizilip jatyr.
