Sońǵy ýaqyttary qoǵamnyń kóńil-kúii anyqtaý úshin Qazaqstandyq qoǵamdyq damý institýty 200-ge jýyq zertteý júrgizgenin «Qazaqstandyq qoǵamdyq damý institýty» KeAQ basqarmasynyń tóraǵasy Nurbek Mátjani Ortalyq kommýnikatsiialar qyzmetiniń podkastynda júrgiziletin zertteýler men qoldanylatyn ádister jaily aityp berdi, – dep habarlaidy Dalanews.kz.
Institýt 2019 jyly qurylǵan. Qazir onyń quramynda bes ortalyq bar: Sotsiologiialyq zertteýler ortalyǵy, Otbasy jáne gender máselelerin zertteitin ortalyq, Qoǵamdyq protsesterdi zertteitin ortalyq, «Media Lab» ortalyǵy jáne Saraptamalyq-taldaý basqarmasy.
– Osy ýaqytqa deiin shamamen 200 tarta túrli deńgeide, túrli formatta jáne túrli kólemdegi zertteýlerdi júrgizdik. Sotsiologiialyq zertteýde kóp qoldanylatyn tásilder sandyq (jappai saýalnama) men sapalyq sotsiologiialyq zertteý. Sapalyq sotsiologiialyq zertteýde tereńdetilgen suqbat jappai saýalnama kórsete almaityn derekterdi alýǵa múmkindik beredi. Bul rette keńinen qoldanylatyn taǵy bir tásil – fokýs-toptyq talqylaýlar dep atalady. Ol jerde birneshe adam suraqtarǵa jaýap berý arqyly zertteýge qatysady. Saýalnama anonimdi túrde júrgiziledi, – dedi Nurbek Mátjani.
QQDI iri zertteýleriniń ishinde «Qazaqstan Respýblikasyndaǵy otbasylyq turmystyq zorlyq-zombylyqqa qarsy is-qimyl» dep atalatyn ulttyq baiandama bar. Onda otbasyndaǵy turmystyq zorlyq-zombylyqtyń sebep-saldary, zańdaǵy olqylyqtar, álemdik tájiribe taldanady.
«Qazaqstan otbasylary» Ulttyq baiandamasyna toqtalatyn bolsaq, bul jerde otbasylyq model qalai ózgerip jatyr, ata-ana men balanyń arasyndaǵy qarym-qatynas, eldegi ajyrasýǵa degen kózqaras kórsetiledi.
Zertteýlerdiń kóbi úsh tilde: qazaq, orys jáne aǵylshyn tilinde usynylady.
