Kishi topta (12 jasqa deiin) Úndistannan kelgen «Velammal MHS Mogappair» mektep oqýshylary barlyq segiz matchta jeńiske jetti. Ekinshi oryn jáne kúmis medal Ýkrainanyń «Lviv Academic Gymnasium» komandasyna berildi (Lvov qalasy). Úshinshi orynǵa birden bes komanda úmitker bolsa, onyń tórteýi Qazaqstannan. Qola júldegerler qosymsha kórsetkishter boiynsha anyqtaldy. Nátijesinde medaldardy Astana qalasynyń Respýblikalyq fizika-matematika mektebinen Alanbek Jainazarov, Ámir Júkenov, Miras Hasenov, Aisultan Anetov aldy.
Al úlken topta (18 jasqa deiin) týrnir aiaqtalýǵa bir kún qalǵanda Stambýldyq «Istanbul ENKA High School» mektebiniń shahmatshylary altyn medalǵa qol jetkizdi.
Qazaqstandyq matematikter Chempionattyń sońǵy kúnine deiin tek jetinshi orynǵa ie bolyp kelse, sońǵy kúni jeńiske degen erekshe tózimdilik pen erik - jigerdiń arqasynda Almatylyq RFMM kúmis aldy. Olardyń 7-shi jáne 8-shi týrdaǵy eki jeńisi, komandalyq upai boiynsha Úndi komandasymen teńesýge, al qosymsha kórsetkishter boiynsha qarsylastarynan basym túsýge yqpal etti. Kúmis júldegerler qatarynda Edgar Mamedov, Imanǵali Aqylbai, Ámir Igen, Zarina Nurǵalieva, Álihan Dáýlet bar. Osylaisha, «Velammal Vidyalaya alapakkam» jáne «Chennai» úndi mektebiniń oqýshylary qola medal alady.
Mańǵystaý oblysynyń ákimi Nurlan Noǵaev bolashaqta Aqtaýda osyndai týrnirler jii ótetinin atap ótti.
- Birneshe kúnge sozylǵan Halyqaralyq shahmat týrniri aiaqtaldy. Bul strategiialyq mańyzdy jarysta bizdiń oqýshylar ózderiniń tapqyrlyǵyn, tereń bilimi men kommýnikatsiialyq mashyqtarynyń joǵary ekenin kórsetti. Memleket basshysy Qasym-Jomart Toqaev Astanada shahmattan álem chempionatynyń ashylýynda «Shahmat-bul adam sanasyn shyńdaityn sport» degen bolatyn. Bul intellektti damytatyn qyzyqty oiyn ǵana emes, sonymen qatar adamnyń oilaýyna oń áser etetin qundy qural ispettes. Osy sport túrimen ainalysa otyryp, bizdiń jasóspirim balalarymyz tapqyrlyǵy men shyǵarmashylyǵyn shyńdaidy, sondai-aq óz qataryna úlgi bolady, - dedi Nurlan Noǵaev.
Jeńimpazdardy marapattaý rásiminde Qazaqstan shahmat Federatsiiasynyń Prezidenti barlyq qatysýshylarǵa shahmattyń mańyzdylyǵyn jáne onyń búkil álemde tanymaldylyǵyn atap ótip, tabys tiledi.
- Búgin munda álemniń 50-den astam elinen ondaǵan komanda jinaldy. Bul búkil álemdegi shahmat qozǵalysynyń keremet tanymaldylyǵyn jáne Qazaqstannyń álemdik shahmatqa áser ete alatynyn kórsetti. Týrnir júzdegen jas shahmatshylardyń mansabyndaǵy alǵashqy núkte bolǵanyna senimdimin. Sondai-aq munda olar jańa dostar men pikirlester taýyp qana qoimai, Aqtaýdyń sulýlyǵynan lázzat alyp, qazaq mádenietin jaqynyraq tani túskenine kúmánim joq, - dedi Timýr Turlov.
Chempionattyń jabylý saltanaty Kaspii teńiziniń jaǵalaýyndaǵy amfiteatrda ótip, túrli-tústi otshashýmen aiaqtaldy.
Toptyq esepte birinshi oryn alǵan túrik komandasynyń oiynshysy Ishik Djan atap ótkendei, chempionat barlyq qatysýshylar úshin úlken shahmat merekesi bolǵan.
- Mundai jarqyn áserdi buryn-sońdy shahmat is-sharalarynda kezdestirmedim. Chempionat óte joǵary deńgeide ótti, - dedi shahmatshy.
Esterińizge sala keteiik, chempionat 4-7 tamyz aralyǵynda bolyp, álemniń 53 elinen 400-den astam oqýshyny jinaǵan bolatyn. Is-sharany halyqaralyq jáne Qazaqstandyq Shahmat federatsiiasy uiymdastyrdy. Bas seriktes jáne demeýshi «Freedom Holding Corp».
Is-shara Mańǵystaý oblysy ákimdiginiń, Qazaqstan Respýblikasy Bilim Ministrliginiń jáne Qazaqstan Respýblikasy Mádeniet jáne sport ministrliginiń qoldaýymen ótti.
