2025 jyl óner salasy úshin álemdik deńgeidegi aitýly oqiǵamen bastaldy. Dimash Qudaibergen Niý-Iorktegi Madison Square Garden sahnasynda jeke kontsert berdi, dep habarlaidy Dalanews.kz.
Myńdaǵan aýditoriiany jinaǵan bul kontsert qazaq óneriniń álemge tanylýyna sebep boldy.
Sonymen qatar 2025 jyl jas ónerpazdar úshin de jemisti kezeń boldy. Olar álemdegi eń iri mýzykalyq baiqaýlarda óner kórsetip, jeńiske jetti.
Atap aitsaq, Erjan Maksim Dýbaida ótken Sanremo Best Song – 2025 baiqaýynyń Gran-pri iegeri, Aleksandr Lim Qazanda ótken XXI «Jańa tolqyn – 2025» konkýrsynyń Gran-pri iegeri, Almagúl Battalieva XXXIV «Slavian bazary» halyqaralyq óner festivaliniń Gran-pri iegeri, El Voice toby Stavropolde ótken «Soldier’s Envelope – 2025» halyqaralyq festivaliniń Gran-pri iegeri, Almaty oblysy Jambyl aýdany Qainazar aýyly №1 orta mektebiniń 7-synyp oqýshysy Miras Naǵashybai XXIII «Vitebsk» halyqaralyq balalar mýzykalyq baiqaýynyń jeńimpazy, Jasmin Túzelova Reseidegi «Golos. Deti» mýzykalyq shoýynyń finalisi, Ernar Sadyrbaev (Amre) Máskeýde ótken «Intervidenie – 2025» halyqaralyq baiqaýynyń finalisi atandy.
Maǵan osy kúnge deiin senimin joǵaltpai, qoldaý kórsetip kele jatqan elime alǵysymdy bildirgim keledi. Kez kelgen jas ónerpaz úshin qoldaý óte mańyzdy. Mádeniet salasyndaǵy áriptesterim de Memleket basshysynyń jan-jaqty qoldaýyn kórip keledi. Bul shyǵarmashylyqqa aitarlyqtai áser etedi. Senim men batyldyq artyp, kóp iske qulshynys paida bolady. Men óz tarapymnan elimizdi odan ári tanyta berýge bar kúsh-jigerimdi salamyn, — dep atap ótti Ernar Sadyrbaev.
Sonymen qatar, biyl shyǵarmashylyq oqý oryndarynyń stýdentteri arasynan baiqaý jeńimpazdarynyń sany 14,9% artty.
Tek 2025 jyldyń ózinde mádeniet salasyndaǵy joǵary oqý oryndary men kolledjderdiń 1511 stýdenti respýblikalyq jáne halyqaralyq festivalderdiń laýreattary men diplomanttary atandy.
Bul jetistikter qazaqstandyq jastardyń álemdik deńgeide básekege qabiletti ekenin kórsetip qana qoimai, el namysyn abyroimen qorǵap júrgenin aiqyn dáleldeidi.
