Úkimet «Aq jol» fraksıasynyń májilis depýtattarynyń Qazaqstandyq taýar óndirýshiler reestri (QTO) máselesi boıynsha usynysyn qoldamady, dep habarlaıdy Dalanews.kz.
Premer-mınıstr Oljas Bektenov depýtattardyń saýalyna jaýap berip, QTO reestrin qurý jumystary josparly túrde júrgizilip jatqanyn aıtty. Bul reestr ishki naryqty qorǵaýǵa jáne otandyq óndirýshilerdi qoldaýǵa baǵyttalǵan, ol qazirgi «CT–KZ» sertıfıkattary men ındýstrıaldyq sertıfıkattardyń ornyn almastyrady. 2024 jyly retteletin satyp alýlar kólemi 29,3 trln teńgeni quraǵan, bul jalpy JİÓ-niń 22%-yna teń, al ishki qun úlesi 50,7% boldy.
Reestrdiń basty artyqshylyǵy – eki kezeńdi tekserý júıesi: avtomattandyrylǵan sıfrlyq verıfıkasıa jáne salalyq sarapshylardyń óndiristi baǵalaýy. Barlyq kásiporyndar, olardyń CT–KZ nemese ındýstrıaldyq sertıfıkattary bolsa jáne tekserýden ótken bolsa, reestrge qosylady, qosymsha qujattar qajet emes. QTO reestriniń elektrondyq platformasy ázirlenip, sıfrlyq verıfıkasıa modýli engizilgen. Reestrdi tolyq iske qosý 2025 jyldyń jeltoqsanynda josparlanǵan.
Sonymen qatar, 60-tan astam normatıvtik-quqyqtyq aktige ózgerister engizilgen, onyń ishinde reestrdi júrgizý erejeleri, óndiristik operasıalar sharttary jáne apelásıalyq komısıanyń qyzmeti bar. Bul normatıvtik qujattardy ázirleýge otandyq óndirýshiler, salalyq asosıasıalar jáne memlekettik organdar tartylǵan. Premer sertıfıkattardy qoldanýdy uzartýdy tıimdi dep sanamaıdy.
Reestrdiń negizgi maqsaty – naqty Qazaqstandyq óndirýshilerdi anyqtaý, olarǵa qoldaý kórsetý jáne retteletin satyp alýlarǵa qol jetkizý. Barlyq óńirlerde onlaın-keńester ótkizilgen, oǵan 2300-den astam bıznes ókili qatysqan. Qatysýshylarǵa túsindirme jumystary júrgizilip, olardyń ózgeristerge daıyndyq deńgeıi artqan.
Esterińizge sala keteıik, "Aq jol" partıasy reestr reformasyn merzimderi men prınsıpteri buzylyp júzege asyrylyp jatyr dep synaǵan. Depýtattardyń aıtýynsha, josparlanǵan krıterıılerdiń tek úshten biri daıyn, keıbiri óndiris salasymen baılanysty emes. Sondaı-aq beınebaqylaý talaptary komersıalyq qupıany buzýy múmkin. Partıa 2026 jylǵy 1 qańtardan júıe iske qosylǵanda myńdaǵan kásiporyndar memlekettik satyp alýlarǵa qol jetkize almaı, jumys oryndaryn joǵaltý qaýpi bar dep alańdaıdy. Sondyqtan depýtattar ótpeli kezeńdi 2026 jylǵy 1 shildege deıin uzartýdy, eski sertıfıkattardy jaramdylyq merzimine deıin saqtaýdy usynǵan.
