Búgin Almaty qalasynda QR Ǵylym jáne joǵary bilim mınıstrliginiń uıymdastyrýymen «Biryńǵaı ýaqyt beldeýi: ǵylymı aspektileri» taqyrybynda dóńgelek ústel ótýde, dep habarlaıdy Dalanews.kz.
İs-shara barysynda sarapshylar ýaqyt beldeýleriniń adam densaýlyǵyna áseri týraly baıandady. Sondaı-aq bıologıalyq yrǵaqtarǵa beıimdelý boıynsha ǵylymı ádister men usynystardy usyndy.
Dóńgelek ústelge QR Ǵylym jáne joǵary bilim mınıstrliginiń, QR Densaýlyq saqtaý mınıstrliginiń ókilderi, joǵary oqýoryndarynyń basshylyǵy men ǴZI ókilderi, medısına jánepsıhologıa salasyndaǵy qazaqstandyq mamandar, sondaı-aq qoǵamdyq densaýlyq saqtaý jáne memlekettik retteý salasyndaǵy sarapshylary qatysty.
Dóńgelek ústeldiń negizgi taqyryptary Qazaqstan halqynyń densaýlyǵyna ýaqyt beldeýleriniń áseri, olarǵa beıimdelý úshin praktıkalyq usynystar jáne elimizdegi ýaqyt saıasatyn ózgertý perspektıvalary boldy.
Jıynda Ǵylym jáne joǵary bilim mınıstri Saıasat Nurbek sóz sóıledi.
«Astronomıalyq sıkldar bizdiń ómirimizdi anyqtaıdy. Biz kún tártibin tabıǵı bıologıalyq yrǵaqtarǵa sáıkestendirgen saıyn ol soǵurlym sapaly bolady. Uıqydan erte turý kúnniń birinshi jartysynda mańyzdy nárseniń bárin oryndaýǵa úlgerip qana qoımaı, otbasy men demalýǵa kóbirek ýaqyt qaldyrýǵa múmkindik beredi», - dep atap ótti mınıstr.
Biryńǵaı ýaqyt beldeýine kóshý, Saıasat Nurbektiń aıtýynsha, ómirdi tabıǵı yrǵaqtarǵa sáıkes uıymdastyrýǵa kómektesedi, bul densaýlyqqa, ónimdilikke jáne jalpy ál-aýqatqa oń áser etedi. Bul úılesimdilikke jasalǵan qadam ǵana emes, sonymen qatar árkimniń ómir súrý sapasyn jaqsartýdyń naqty múmkindigi.
Eske salaıyq, buǵan deıin Premer-mınıstr Oljas Bektenovtiń qatysýymen ótken Úkimet otyrysynda saýda jáne ıntegrasıa mınıstri Arman Shaqqalıev Qazaqstannyń 5-shi ýaqyt beldeýine kóshýiniń artyqshylyqtaryn aıtqan bolatyn. Ol UTC+5 ýaqyt beldeýi el halqynyń 76 paıyzdan astamy (15 mıllıon 240 myń adam) kiretin Astana, Almaty, Petropavl, Óskemen, Shymkent, Semeı jáne Pavlodar qalalaryn qosqanda, 67,5-ten 82,5 gradýsqa deıingi boılyqty qamtıtynyn aıtty.
Premer-mınıstr Oljas Bektenov neǵurlym túsinikti aqparattyq-túsindirý naýqanyn júrgizýdi tapsyrdy.
