Qazaqstandyq erikti jastar plastik buiymdarmen kúresti qolǵa aldy
Ivan Jabaev bastaǵan Atbasarlyq erikti jastar qorshaǵan ortany plastika buiymdardan tazalaý maqsatynda saýapty, jaýapty jobany qolǵa alǵan eken.
Ekologiiaǵa zardabyn tigizbeitin sándi sapaly eko sómkeler tigýdi qolǵa alǵan jetkinshekter osy arqyly "Qazaqstanda eko-eriktiler qozǵalysyn qurýǵa bastamashy bolamyz" deidi.
"Tóńiregimiz plastikalyq paketterge toly. Olar jerge sińbeidi. Kerisinshe, qorshaǵan ortany ýlap, álgi paketterden ýaqyt óte kele ziiandy zattar bólinedi. Olar kókónisterge, jemis-jidekterge aralasady, ainalyp kelip bizdiń dastarhanymyzǵa túsedi. Munyń bári bizdiń densaýlymyzǵa keri áserin tigizedi», – deidi volonter.
Jetkinshektiń ideiasyn ózimen birge oqityn tetelesteri qoldap, qýattai ketken. Atbasarlyq volonterler Ivanǵa kómektesý maqsatynda arnaiy aktsiia uiymdastyryp, shara kezinde jinalǵan qarajatty eko-sómkeler jasaýǵa baǵyttaǵan.
«Shyny kerek, jobany bastamai turyp eshbirimiz de mundai sómkelerdi qalai tigýdi bilmedik. Biraq, ne nársege bolmasyn úirenedi ekensiń. Óz jobamyzdy elimizdegi ekologiiaǵa beijai qaramaityn mekemelerge usynyp azdaǵan grant utyp aldyq. Bul sómkeler aýdan turǵyndarynyń arasynda erekshe suranysqa ie. Aýdan halqy volonterliktiń ne ekenin endi-endi túsinip keledi», – deidi jetkinshekter.
Atbasarlyq volonterler aldaǵy ýaqytta «Polietilen sómkelerge jol joq!» atty aýqymdy aktsiia ótkizýdi josparlap otar. Olar aýdan halqynan osynaý sharadan qalys qalmaýdy suraidy.
Al eriktiler jasap shyqqan sómkelerdiń syrt jaǵynda «Men plastikke qarsymyn!», «Men ekobelsendimin» degen mańyzdy jazýlar jazylǵan. Sarapshylardyń dereginshe, búginderi Qazaqstanda 490 myń tonnaǵa jýyq plastik ónimderi jinaqtalyp qalǵan. Olardy qaita óńdeý isin shuǵyl qolǵa alý qajet. Statistika agenttiginiń málimet etkenindei 2019 jyly elimizdegi plastiktiń 90 myń tonnasy ǵana sorttalypty.
