Qazaqstandyq bloger úi utysyn uiymdastyryp, milliardtaǵan teńge paida taýyp, salyq tóleýden jaltarǵan. Bul týraly Memlekettik kirister komiteti málimdedi, dep habarlaidy Dalanews.kz.
Resmi málimetke sáikes, bloger 30 myń teńgege kýrs satyp, satyp alýshylar arasynda lotereia uiymdastyrǵan. Osylaisha, ol 1,5 milliard teńge jinap, onyń 300 million teńgesine úi syilaǵan. Qalǵan 1,2 milliard teńgeni óz qaltasyna basyp, salyq tólemegen.
Belgili jýrnalist Mihail Kozachkov atalǵan jaitqa bailanysty pikir bildirdi.
"Ashyq derekkózderge súiensek, bul Darhan Jolshybekov bolýy múmkin. Onyń buǵan deiin balasyna tólenetin aliment máselesi boiynsha basy daýǵa qalǵan. Resmi túrde 70 myń teńge jalaqy alatynyn kórsetip, 20 myń teńge aliment tólep kelgen. Keiin sot ony ai saiyn 30 AEK (100 myń teńgeden asa) kóleminde tóleýge mindettegen", – deidi ol.
Aitýynsha, qazirgi ýaqytta blogerge qatysty qandai shara qoldanylatyny belgisiz.
"Memlekettik organdar salyqty qosymsha eseptep, jaýapqa tartý máselesin qarastyra ma, álde mundai isterge kóz juma ma – bul suraq áli ashyq kúiinde qalyp otyr", – dep jazdy ol.
Eske salaiyq, buǵan deiin salyq tólemei kelgen blogergerge qatysty aqparat taraǵan edi. Qazaqstandyq blogerlerge qatysty salyqtyq tekserýlerdiń ne sebepti bastalǵanyn Memlekettik kirister komiteti (MKK) túsindirdi.MKK jeke tulǵalardyń kiristerin ákimshilendirý basqarmasynyń basshysy Dina Qusaiynovanyń TengriTV YouTube arnasyna bergen suhbatynda aitýynsha, salyq organdaryna qazaqstandyqtardan birneshe shaǵym túsken.
«Bul jumysty kóptegen azamattardyń shaǵymdary negizinde bastadyq. Bizge azamattardan blogerlerdiń sán-saltanatqa toly ómir súretini, alaida salyq tólemeitini týraly ótinishter kelip tústi. «Olardy tekserińizder, olar qymbat kólikterde júredi, elitalyq páterlerde turady, záýlim úiler satyp alady» degen suraqtar týyndady. Árine, halyq olardyń qansha salyq tóleitinin bilgisi keledi», – dedi Dina Qusaiynova.
Onyń aitýynsha, blogerlerge salyqtyq habarlamalar 2025 jyldyń aqpanynda jiberilgen jáne ol 2022-2023 jyldarǵa júrgizilgen taldaýǵa negizdelgen.
«Ol ýaqytta blogerler tabys taýyp otyrdy. Keibireýleri salyq deklaratsiiasyn tapsyrsa, keibireýleri múlde tapsyrmaǵan. Al keibir blogerler kiristerin «nól» dep kórsetken. Sondyqtan biz taldaý júrgizip, sáikessizdikterdi anyqtadyq», – dep túsindirdi MKK ókili.
Kóptegen blogerler jinaǵan qarajattarynyń qaiyrymdylyqqa, týǵan kúnderge nemese jaqyndaryna aýdarylǵanyn alǵa tartqan. Bul másele boiynsha Dina Qusaiynova naqty túsinikteme berdi.
«Qaiyrymdylyq týraly zań bar. Qaiyrymdylyq kómek retinde alynǵan qarajat týraly ýákiletti organdarǵa esep berý kerek. Qashan, kimnen, qandai soma alynǵany kórsetilýi tiis. Eger osyndai esepter usynylsa, olar mindetti túrde eskeriledi.
Sonymen qatar, basqa da kiris túrleri bar. «Qaiyrymdylyq kómek», «demeýshilik kómek» degen uǵymdar bar. Munyń bári de kiris retinde qaralyp, salyq kodeksine sáikes rettelýi tiis. Eger bul buryn jasalmasa, blogerler qosymsha salyq deklaratsiiasyn tapsyryp, barlyq kiristerin kórsetýine bolady. Olardyń habarlamaǵa jaýap berýine 30 jumys kúni, iaǵni shamamen 1,5 ai ýaqyty bar»*, – dep túsindirdi basqarma basshysy.
Qazaqstandyq blogerlerdiń keibiri bul salyqtyq tekserýlerdi «kórsetilgen qysym» dep ataǵan edi. Buǵan jaýap retinde Dina Qusaiynova tekserýlerdiń maqsaty jazalaý emes, memlekettik biýdjetti tolyqtyrý ekenin atap ótti.
«Bul sóz tym óreskel estiledi. Jalpy, bizdiń basty mindetimiz – memlekettik biýdjetke túsetin kiristi arttyrý jáne barlyq jeke tulǵalardyń salyq tóleýin qamtamasyz etý. Biz úshin adam bloger me, jýrnalist pe, kásipker me – mańyzdy emes. Barlyǵy zańǵa sáikes salyq tóleýge mindetti», – dep atap ótti ol.
Sonymen qatar, ol bul tekserýler «joǵarydan túsken tapsyrma» degen pikirlerge jaýap berdi.
«Habarlamalar tek aqpanda ǵana jiberilgen joq. Buǵan deiin de osyndai eskertýler bolǵan. Keibir blogerler únsiz qosymsha deklaratsiia tapsyrdy jáne salyqtaryn tóledi. Al keibireýleri áleýmettik jelide bul protsesti durys emes dep esepteitinin aityp jatyr. Eger bir nársege kelispese, bizge dálelderimen birge túsinikteme usynsyn. Barlyq kiristerin naqtylap, salyq organyna qajetti aqparat bersin.
