Qaznews24 satıralyq paraqshasynyń avtory Temirlan Eńsebekke qatysty sot otyrysy keıinge shegerildi, dep habarlaıdy Dalanews.kz.
Tilkespekjoq telegram-arnasynyń málimetinshe, sot búgin ótýi kerek bolǵan.
“Búgin saǵat 10:00-de satıralyq Qaznews24 pablıginiń avtory Temirlan Eńsebekke qatysty sot otyrysy ótýi tıis edi. Alaıda prokýrordyń ótinishi boıynsha sot 21 aqpanǵa aýystyryldy”, — dedi derekkóz.
Aıta keteıik, buǵan deıin Human Rights Watch (HRW) Qazaqstan úkimetinen Temirlan Eńsebekke qatysty aıyptardy alyp, ony túrmeden bosatýdy talap etken bolatyn.
Quqyq qorǵaýshylar bul qylmystyq qýdalaýdy shekten tys dep sanaıdy. Olardyń aıtýynsha, blogerdiń jarıalaǵan jazbalarynda zorlyq-zombylyqqa nemese kemsitýshilikke shaqyrý bolmaǵan. Al, Qylmystyq kodekstiń 174-babyn («arazdyqty qozdyrý») sóz bostandyǵyn shekteý úshin paıdalanyp otyr. Human Rights Watch bul Eńsebektiń birinshi ret qýdalanýy emestigin eske saldy: 2021 jyly oǵan jalǵan aqparat taratty degen aıyp taǵylyp, keıin is jabylǵan bolatyn.
"Qarapaıym tilmen aıtqanda, bul jerde eshqandaı qylmys joq, tek bılik tarapynan qylmystyq quqyqty asyra paıdalaný bar. Qazaqstan úkimeti Eńsebekke qatysty negizsiz jáne shekten tys qylmystyq "arandatýshylyq" aıypty tez arada joıýy jáne ony sotqa deıin qamaýdan bosatýy qajet", – dedi Human Rights Watch uıymynyń Ortalyq Azıa boıynsha aǵa zertteýshisi Mıra Rıttmann.
Human Rights Watch Qazaqstan úkimetin sóz bostandyǵyn qorǵaýǵa jáne blogerge qarsy qylmystyq qýdalaýdy toqtatýǵa shaqyrdy.
Eske salaıyq, QazNews24 satıralyq pablıginiń avtory Temirlan Eńsebekti polısıa 17 qańtarda úıine tintý júrgizgennen keıin ustap áketken. 18 qańtarda Eńsebek eki aıǵa qamaýǵa alyndy. Oǵan "ultaralyq alaýyzdyq qozdyrdy" degen aıyp taǵylyp otyr. Polısıa qylmystyq istiń sebebi – ultaralyq arazdyqty qozdyrý jáne etnostardyń biriniń ókilderin qorlaý belgileri bar materıaldy jarıalaý bolǵan.
Belgili zańger Janar Balǵabaevanyń aıtýynsha, Temirlan Eńsebektiń qamalýyna "Ioý, orystar" degen án túrtki bolǵan. Eńsebek bul ándi reseılik telejúrgizýshi Tına Kandelakı týraly postyna qosqan. Ánde balaǵat sózder bar.
Ol 174-bap "Áleýmettik, ulttyq, rýlyq, násildik, taptyq nemese dinı alaýyzdyqty qozdyrý" boıynsha aıyptalyp otyr. Temirlan Eńsebek 2 jyldan 7 jylǵa deıin bas bostandyǵynan aıyrylýy múmkin.
