Qaznews24 ساتيرالىق پاراقشاسىنىڭ اۆتورى تەمىرلان ەڭسەبەككە قاتىستى سوت وتىرىسى كەيىنگە شەگەرىلدى، دەپ حابارلايدى Dalanews.kz.
Tilkespekjoq تەلەگرام-ارناسىنىڭ مالىمەتىنشە، سوت بۇگىن ءوتۋى كەرەك بولعان.
“بۇگىن ساعات 10:00-دە ساتيرالىق Qaznews24 پابليگىنىڭ اۆتورى تەمىرلان ەڭسەبەككە قاتىستى سوت وتىرىسى ءوتۋى ءتيىس ەدى. الايدا پروكۋروردىڭ ءوتىنىشى بويىنشا سوت 21 اقپانعا اۋىستىرىلدى”، — دەدى دەرەككوز.
ايتا كەتەيىك، بۇعان دەيىن Human Rights Watch (HRW) قازاقستان ۇكىمەتىنەن تەمىرلان ەڭسەبەككە قاتىستى ايىپتاردى الىپ، ونى تۇرمەدەن بوساتۋدى تالاپ ەتكەن بولاتىن.
قۇقىق قورعاۋشىلار بۇل قىلمىستىق قۋدالاۋدى شەكتەن تىس دەپ سانايدى. ولاردىڭ ايتۋىنشا، بلوگەردىڭ جاريالاعان جازبالارىندا زورلىق-زومبىلىققا نەمەسە كەمسىتۋشىلىككە شاقىرۋ بولماعان. ال، قىلمىستىق كودەكستىڭ 174-بابىن («ارازدىقتى قوزدىرۋ») ءسوز بوستاندىعىن شەكتەۋ ءۇشىن پايدالانىپ وتىر. Human Rights Watch بۇل ەڭسەبەكتىڭ ءبىرىنشى رەت قۋدالانۋى ەمەستىگىن ەسكە سالدى: 2021 جىلى وعان جالعان اقپارات تاراتتى دەگەن ايىپ تاعىلىپ، كەيىن ءىس جابىلعان بولاتىن.
"قاراپايىم تىلمەن ايتقاندا، بۇل جەردە ەشقانداي قىلمىس جوق، تەك بيلىك تاراپىنان قىلمىستىق قۇقىقتى اسىرا پايدالانۋ بار. قازاقستان ۇكىمەتى ەڭسەبەككە قاتىستى نەگىزسىز جانە شەكتەن تىس قىلمىستىق "ارانداتۋشىلىق" ايىپتى تەز ارادا جويۋى جانە ونى سوتقا دەيىن قاماۋدان بوساتۋى قاجەت"، – دەدى Human Rights Watch ۇيىمىنىڭ ورتالىق ازيا بويىنشا اعا زەرتتەۋشىسى ميرا ريتتمانن.
Human Rights Watch قازاقستان ۇكىمەتىن ءسوز بوستاندىعىن قورعاۋعا جانە بلوگەرگە قارسى قىلمىستىق قۋدالاۋدى توقتاتۋعا شاقىردى.
ەسكە سالايىق، QazNews24 ساتيرالىق پابليگىنىڭ اۆتورى تەمىرلان ەڭسەبەكتى پوليسيا 17 قاڭتاردا ۇيىنە ءتىنتۋ جۇرگىزگەننەن كەيىن ۇستاپ اكەتكەن. 18 قاڭتاردا ەڭسەبەك ەكى ايعا قاماۋعا الىندى. وعان "ۇلتارالىق الاۋىزدىق قوزدىردى" دەگەن ايىپ تاعىلىپ وتىر. پوليسيا قىلمىستىق ءىستىڭ سەبەبى – ۇلتارالىق ارازدىقتى قوزدىرۋ جانە ەتنوستاردىڭ ءبىرىنىڭ وكىلدەرىن قورلاۋ بەلگىلەرى بار ماتەريالدى جاريالاۋ بولعان.
بەلگىلى زاڭگەر جانار بالعابايەۆانىڭ ايتۋىنشا، تەمىرلان ەڭسەبەكتىڭ قامالۋىنا "يوۋ، ورىستار" دەگەن ءان تۇرتكى بولعان. ەڭسەبەك بۇل ءاندى رەسەيلىك تەلەجۇرگىزۋشى تينا كاندەلاكي تۋرالى پوستىنا قوسقان. اندە بالاعات سوزدەر بار.
ول 174-باپ "الەۋمەتتىك، ۇلتتىق، رۋلىق، ناسىلدىك، تاپتىق نەمەسە ءدىني الاۋىزدىقتى قوزدىرۋ" بويىنشا ايىپتالىپ وتىر. تەمىرلان ەڭسەبەك 2 جىلدان 7 جىلعا دەيىن باس بوستاندىعىنان ايىرىلۋى مۇمكىن.
