Búgin SCAT jáne Air Astana áýe kompaniialary Dýbai men Dohadan Almaty jáne Astana qalalaryna 6 reis oryndamaq. Bul týraly QR Kólik ministrligi málimdedi, dep habarlaidy Dalanews.kz.
Ministrlik málimetinshe, Taiaý Shyǵys baǵytyndaǵy reister áli de alty eldiń (Iran, Izrail, Irak, Iordaniia, Siriia jáne Livan) áýe keńistigin ainalyp ótip oryndalyp jatyr.
Air Astana 25 maýsymnan bastap Dýbaidan Almaty men Astanaǵa, sondai-aq Dohadan Almatyǵa turaqty reisterin qaita bastady. Aldyńǵy kúnderi toqtatylǵan reisterdiń jolaýshylaryn elge qaitarý úshin qosymsha repatriatsiialyq reister uiymdastyrylýda.
SCAT áýe kompaniiasy Qatar memleketinen azamattardy elge jetkizýdi bastady. Alǵashqy Doha–Almaty reisi búgin Katar ýaqytymen 07:35-te ushyp shyqty. Ushaq bortynda 213 jolaýshy boldy. Sonymen qatar búgin Doha–Astana baǵyty boiynsha taǵy bir reis oryndalady, ushaq Katar ýaqytymen 14:30-da ushyp shyǵady. Bul reispen 290 jolaýshynyń kelýi kútilip otyr.
Aldaǵy kúnderi Doha–Astana baǵyty boiynsha kelesi charterlik reis 27 maýsymda, al Doha–Almaty reisi 29 maýsymda oryndalady.
Aita keteiik, buǵan deiin Taiaý Shyǵystaǵy jaǵdaidyń shielenisýine bailanysty qazaqstandyq áýe kompaniialary reisterdi ýaqytsha toqtatqan edi.
“2025 jyly 24 maýsymdaǵy jaǵdai boiynsha Taiaý Shyǵystaǵy áskeri-saiasi ahýaldyń kúrt shielenisýine bailanysty birqatar elde resmi túrde shekteýler engizilip, azamattyq aviatsiiaǵa arnalǵan áýe keńistikteri jabyldy. Májbúrli sharalar qarýdy qoldaný qaýpi, navigatsiialyq júielerdiń durys jumys istemeýi, áýe qorǵanysy júieleriniń belsendiligi jáne azamattyq áýe kemeleriniń ushýy úshin joǵary táýekelderge bailanysty qabyldandy”, — dep habarlady Kólik ministrligi.
Sońǵy málimetke sáikes, shekteýler kelesi elderde qoldanylady:
- Izrail áýe keńistigi tolyq jabyq;
- Iran áýe keńistigi tolyq jabyq (onyń ishinde Parsy jáne Oman shyǵanaqtary);
- Irak, Iordaniia, Livan — zymyran men dron shabýyl qaýpine sáikes ushýlardy ýaqytsha shekteý;
- Kýveit, Bahrein, BAÁ — reisterdi shekteý jáne toqtatý, ishinara qaqtyǵys aimaǵyna jaqyn marshrýttardy buǵattaý.
“Iri halyqaralyq aviatasymaldaýshylar da reisterdi ýaqytsha toqtatty. Olardyń qatarynda Air France-KLM, United, American Airlines, Japan Airlines, Air Canada
Dýbai, Doha jáne Er-Riiadqa ushýdy toqtatty. Qatar Airways ushý kestesin retteidi. Etihad resmi eskertý jasady. Emirates qaqtyǵys aimaǵyn ainalyp,ushýdy jalǵastyrýda”, — dedi ministrlik.
Aitýlarynsha, osyǵan bailanysty qazaqstandyq áýe kompaniialary qaýipsizdikti qamtamasyz etý maqsatynda Dýbai men Doha qalalaryna birqatar reisti ýaqytsha toqtatty.
“Demek elimizden shetelge shyqpaq bolǵan adam sany 683 bolsa, shetelden elge oralatyn adam sany — 1051. Jalpy alǵanda bul jaǵdai 1 734 jolaýshyǵa áser etti.
