بۇگىن SCAT جانە Air Astana اۋە كومپانيالارى دۋباي مەن دوحادان الماتى جانە استانا قالالارىنا 6 رەيس ورىنداماق. بۇل تۋرالى ق ر كولىك مينيسترلىگى مالىمدەدى، دەپ حابارلايدى Dalanews.kz.
مينيسترلىك مالىمەتىنشە، تاياۋ شىعىس باعىتىنداعى رەيستەر ءالى دە التى ەلدىڭ (يران، يزرايل، يراك، يوردانيا، سيريا جانە ليۆان) اۋە كەڭىستىگىن اينالىپ ءوتىپ ورىندالىپ جاتىر.
Air Astana 25 ماۋسىمنان باستاپ دۋبايدان الماتى مەن استاناعا، سونداي-اق دوحادان الماتىعا تۇراقتى رەيستەرىن قايتا باستادى. الدىڭعى كۇندەرى توقتاتىلعان رەيستەردىڭ جولاۋشىلارىن ەلگە قايتارۋ ءۇشىن قوسىمشا رەپاترياسيالىق رەيستەر ۇيىمداستىرىلۋدا.
SCAT اۋە كومپانياسى قاتار مەملەكەتىنەن ازاماتتاردى ەلگە جەتكىزۋدى باستادى. العاشقى دوحا–الماتى رەيسى بۇگىن كاتار ۋاقىتىمەن 07:35-تە ۇشىپ شىقتى. ۇشاق بورتىندا 213 جولاۋشى بولدى. سونىمەن قاتار بۇگىن دوحا–استانا باعىتى بويىنشا تاعى ءبىر رەيس ورىندالادى، ۇشاق كاتار ۋاقىتىمەن 14:30-دا ۇشىپ شىعادى. بۇل رەيسپەن 290 جولاۋشىنىڭ كەلۋى كۇتىلىپ وتىر.
الداعى كۇندەرى دوحا–استانا باعىتى بويىنشا كەلەسى چارتەرلىك رەيس 27 ماۋسىمدا، ال دوحا–الماتى رەيسى 29 ماۋسىمدا ورىندالادى.
ايتا كەتەيىك، بۇعان دەيىن تاياۋ شىعىستاعى جاعدايدىڭ شيەلەنىسۋىنە بايلانىستى قازاقستاندىق اۋە كومپانيالارى رەيستەردى ۋاقىتشا توقتاتقان ەدى.
“2025 جىلى 24 ماۋسىمداعى جاعداي بويىنشا تاياۋ شىعىستاعى اسكەري-ساياسي احۋالدىڭ كۇرت شيەلەنىسۋىنە بايلانىستى ءبىرقاتار ەلدە رەسمي تۇردە شەكتەۋلەر ەنگىزىلىپ، ازاماتتىق اۆياسياعا ارنالعان اۋە كەڭىستىكتەرى جابىلدى. ءماجبۇرلى شارالار قارۋدى قولدانۋ ءقاۋپى، ناۆيگاسيالىق جۇيەلەردىڭ دۇرىس جۇمىس ىستەمەۋى، اۋە قورعانىسى جۇيەلەرىنىڭ بەلسەندىلىگى جانە ازاماتتىق اۋە كەمەلەرىنىڭ ۇشۋى ءۇشىن جوعارى تاۋەكەلدەرگە بايلانىستى قابىلداندى”، — دەپ حابارلادى كولىك مينيسترلىگى.
سوڭعى مالىمەتكە سايكەس، شەكتەۋلەر كەلەسى ەلدەردە قولدانىلادى:
- يزرايل اۋە كەڭىستىگى تولىق جابىق؛
- يران اۋە كەڭىستىگى تولىق جابىق (ونىڭ ىشىندە پارسى جانە ومان شىعاناقتارى)؛
- يراك، يوردانيا، ليۆان — زىمىران مەن درون شابۋىل قاۋپىنە سايكەس ۇشۋلاردى ۋاقىتشا شەكتەۋ؛
- كۋۆەيت، باحرەين، ءباا — رەيستەردى شەكتەۋ جانە توقتاتۋ، ءىشىنارا قاقتىعىس ايماعىنا جاقىن مارشرۋتتاردى بۇعاتتاۋ.
“ءىرى حالىقارالىق اۆياتاسىمالداۋشىلار دا رەيستەردى ۋاقىتشا توقتاتتى. ولاردىڭ قاتارىندا Air France-KLM، United، American Airlines، Japan Airlines، Air Canada
دۋباي، دوحا جانە ەر-ريادقا ۇشۋدى توقتاتتى. Qatar Airways ۇشۋ كەستەسىن رەتتەيدى. Etihad رەسمي ەسكەرتۋ جاسادى. Emirates قاقتىعىس ايماعىن اينالىپ،ۇشۋدى جالعاستىرۋدا”، — دەدى مينيسترلىك.
ايتۋلارىنشا، وسىعان بايلانىستى قازاقستاندىق اۋە كومپانيالارى قاۋىپسىزدىكتى قامتاماسىز ەتۋ ماقساتىندا دۋباي مەن دوحا قالالارىنا ءبىرقاتار رەيستى ۋاقىتشا توقتاتتى.
“دەمەك ەلىمىزدەن شەتەلگە شىقپاق بولعان ادام سانى 683 بولسا، شەتەلدەن ەلگە ورالاتىن ادام سانى — 1051. جالپى العاندا بۇل جاعداي 1 734 جولاۋشىعا اسەر ەتتى.
