Qazaqstan temir joly kompaniiasy 2026 jyldyń sońyna deiin eldegi barlyq poiyzdy internetpen qamtýdy josparlap otyr, dep habarlaidy dalanews.kz.
Bul týraly Úkimettegi brifing barysynda «Qazaqstan temir joly» UK» AQ basqarma tóraǵasy Talǵat Aldybergenov málimdedi.
Onyń aitýynsha, qazirgi ýaqytta poiyzdardy internetpen qamtý boiynsha jańǵyrtý jumystary kezeń-kezeńimen júrgizilip jatyr.
«Bizde poiyzdarda internet ornatý boiynsha jańǵyrtý jumystary kezeń-kezeńimen júrgizilip jatyr. Biylǵy jyldyń sońyna deiin barlyq poiyzdy internetpen qamtamasyz etemiz dep oilaimyn», – dedi Aldybergenov.
Al QTJ basqarma tóraǵasynyń orynbasary Anýar Ahmetjanov jolaýshylar poiyzdaryndaǵy spýtniktik internet budan da erterek iske qosylatynyn aitty.
Onyń sózinshe, qazirdiń ózinde «Nurly jol – Semei» baǵyty tolyqtai internetpen qamtylǵan.
«Qazirdiń ózinde «Nurly jol – Semei» poiyzy tolyqtai internetpen qamtylǵan. Almaty – Pavlodar, Pavlodar – Túrkistan, «Nurly jol – Atyraý» jáne basqa da birqatar baǵyttardaǵy poiyzdarǵa terminaldar ornatylyp jatyr. Eń aldymen jolaýshylar eń kóp qatynaityn baǵyttardy tańdap otyrmyz. Osylaisha kópshilik internettiń múmkindigin paidalanyp, onyń sapasyn baǵalai alady. Jazdyń sońyna deiin negizgi baǵyttardyń barlyǵyn spýtniktik internetpen qamtamasyz etýdi josparlap otyrmyz», – dedi Ahmetjanov.
Onyń aitýynsha, aldymen jolaýshylar aǵyny joǵary baǵyttarǵa basymdyq beriledi. Jazdyń sońyna deiin negizgi temirjol marshrýttary spýtniktik internetpen qamtylyp, keiin joba barlyq poiyzdarǵa kezeń-kezeńimen engiziledi.
