QR Qarjy ministrligi Memlekettik kirister komiteti jahandyq tsifrlyq platformalarmen ózara is-qimyldy jetildirý aiasynda 2025 jylǵy mamyrdan bastap OpenAI, L.L.C. kompaniiasy shartty túrde tirkeýi júrgizilgenin málimdedi. Bul — jasandy intellekt salasyndaǵy jetekshi amerikalyq uiym, keńinen tanymal ChatGPT intellektýaldyq júiesiniń ázirleýshisi, dep habarlaidy Dalanews.kz.
"2022 jyldan bastap Qazaqstanda tsifrlyq qyzmetterge salyq – "Google salyǵy" sátti engizildi. Bul shara el naryǵynda jumys isteitin transulttyq IT-kompaniialarǵa ádil salyq salý jolyndaǵy mańyzdy qadam boldy", - deidi quzyrly vedomstvo.
Endi Qazaqstan aýmaǵyndaǵy jeke tulǵalarǵa qyzmet kórsetkeni úshin ChatGPT Qazaqstan Respýblikasynyń salyq zańnamasyna sáikes qosymsha qun salyǵyn tóleitin bolady.
ChatGPT — bul jasandy intellektige negizdelgen chat-bot. GPT (Generative Pre-trained Transformer) tildik modeli negizinde jumys isteidi jáne kelesidei múmkindikterge ie:
- suraqtar men ótinishterdi túsiný;
- maǵynaly ári qisyndy jaýaptar qurastyrý;
- aýdarma, hat jazý, kodtaý, oqý jáne basqa da salalarda kómek kórsetý.
ChatGPT-ti virtýaldy kómekshi, keńesshi, suhbattasýshy nemese shyǵarmashylyq pen jumysqa arnalǵan qural retinde paidalanýǵa bolady.
Aita ketsek, 2025 jyly 30 sáýirde Májilis Salyq kodeksi jobasyn ekinshi oqylymda qabyldady. Onda qosymsha qun salyǵynyń kólemi 12%-dan 16%-ǵa ósirildi. Bul ózgeris kelesi jyldyń basynan bastap óz kúshine enedi dep kútiledi.
