Qarjy monıtorıńi agenttigi "Tıolaın" kompanıasynyń teń ıesi Vıktor Dolgalevke qatysty tergeý júrgizip jatyr, - dep habarlaıdy Dalanews.kz.
3 aqpanda Soltústik Qazaqstan oblysynyń Polısıa departamentiniń qyzmetkerleri "Tıolaın" kompanıasynyń ıeleriniń biri Vıktor Dolgalevti jer qoınaýyn ruqsatsyz paıdalanǵany úshin ustady.
"Sot sanksıasymen ol qamaýǵa alyndy. Qylmystyq is odan ári tergeý úshin QMA Soltústik Qazaqstan oblysy boıynsha departamentine jiberildi. Sondaı-aq, V.Dolgalevke qatysty asa iri kólemde kiris alý arqyly zańsyz kásipkerlikpen aınalysqany úshin tergeý júrgizilip jatyr", - dep jazylǵan vedomstvo málimetinde.
Tergeý málimetteri boıynsha 2021 jylǵy naýryzda Indýstrıa jáne ınfraqurylymdyq damý mınıstrligi kompanıanyń 38 mıllıard teńgege qarjylyq jáne ınvestısıalyq mindettemelerin oryndamaýyna baılanysty "Obýhovskoe" ken ornynda jer qoınaýyn paıdalaný boıynsha kelisimshartty merziminen buryn toqtatqan.
Joǵarǵy Sot quziretti organnyń is-qımyldarynyń zańdylyǵyn rastady.
Sonymen qatar, 2020 jylǵy 1 maýsymda sot sheshimimen V.Dolgalevke "Tıolaın" kompanıasynyń múlkin basqarýǵa tyıym salyndy.
Osyǵan qaramastan, V.Dolgalev óziniń baqylaýyndaǵy qurylymdar arqyly zańsyz taý-ken óndirisin jalǵastyryp, Qytaıǵa jáne basqa elderge kóleńkeli shemalar boıynsha eksporttaǵan. Tek úsh jyl ishinde (2021-2023 jj.) 113 myń tonnaǵa jýyq ken eksporttaldy.
Qylmystyq tabystyń jalpy somasy 26 mlrd teńgeden asqan. Bul qarajatqa enshiles tulǵalar arqyly ken ornyna irgeles jatqan 7,5 myńǵa jýyq gektar aýyl sharýashylyǵy maqsatyndaǵy jerler satyp alynyp, ol jerde de zańsyz ken óndirý júrgizilgen. Sonymen qatar, 2 mlrd teńgege búdjetke tólenetin salyqtar men tólemderden jaltarý derekteri anyqtaldy.
