قارجى مونيتورينگى اگەنتتىگى "تيولاين" كومپانياسىنىڭ تەڭ يەسى ۆيكتور دولگاليەۆكە قاتىستى تەرگەۋ جۇرگىزىپ جاتىر، - دەپ حابارلايدى Dalanews.kz.
3 اقپاندا سولتۇستىك قازاقستان وبلىسىنىڭ پوليسيا دەپارتامەنتىنىڭ قىزمەتكەرلەرى "تيولاين" كومپانياسىنىڭ يەلەرىنىڭ ءبىرى ۆيكتور دولگاليەۆتى جەر قويناۋىن رۇقساتسىز پايدالانعانى ءۇشىن ۇستادى.
"سوت سانكسياسىمەن ول قاماۋعا الىندى. قىلمىستىق ءىس ودان ءارى تەرگەۋ ءۇشىن قما سولتۇستىك قازاقستان وبلىسى بويىنشا دەپارتامەنتىنە جىبەرىلدى. سونداي-اق، ۆ.دولگاليەۆكە قاتىستى اسا ءىرى كولەمدە كىرىس الۋ ارقىلى زاڭسىز كاسىپكەرلىكپەن اينالىسقانى ءۇشىن تەرگەۋ جۇرگىزىلىپ جاتىر"، - دەپ جازىلعان ۆەدومستۆو مالىمەتىندە.
تەرگەۋ مالىمەتتەرى بويىنشا 2021 جىلعى ناۋرىزدا يندۋستريا جانە ينفراقۇرىلىمدىق دامۋ مينيسترلىگى كومپانيانىڭ 38 ميلليارد تەڭگەگە قارجىلىق جانە ينۆەستيسيالىق مىندەتتەمەلەرىن ورىنداماۋىنا بايلانىستى "وبۋحوۆسكوە" كەن ورنىندا جەر قويناۋىن پايدالانۋ بويىنشا كەلىسىمشارتتى مەرزىمىنەن بۇرىن توقتاتقان.
جوعارعى سوت قۇزىرەتتى ورگاننىڭ ءىس-قيمىلدارىنىڭ زاڭدىلىعىن راستادى.
سونىمەن قاتار، 2020 جىلعى 1 ماۋسىمدا سوت شەشىمىمەن ۆ.دولگاليەۆكە "تيولاين" كومپانياسىنىڭ مۇلكىن باسقارۋعا تىيىم سالىندى.
وسىعان قاراماستان، ۆ.دولگاليەۆ ءوزىنىڭ باقىلاۋىنداعى قۇرىلىمدار ارقىلى زاڭسىز تاۋ-كەن ءوندىرىسىن جالعاستىرىپ، قىتايعا جانە باسقا ەلدەرگە كولەڭكەلى سحەمالار بويىنشا ەكسپورتتاعان. تەك ءۇش جىل ىشىندە (2021-2023 جج.) 113 مىڭ تونناعا جۋىق كەن ەكسپورتتالدى.
قىلمىستىق تابىستىڭ جالپى سوماسى 26 ملرد تەڭگەدەن اسقان. بۇل قاراجاتقا ەنشىلەس تۇلعالار ارقىلى كەن ورنىنا ىرگەلەس جاتقان 7،5 مىڭعا جۋىق گەكتار اۋىل شارۋاشىلىعى ماقساتىنداعى جەرلەر ساتىپ الىنىپ، ول جەردە دە زاڭسىز كەن ءوندىرۋ جۇرگىزىلگەن. سونىمەن قاتار، 2 ملرد تەڭگەگە بيۋدجەتكە تولەنەتىن سالىقتار مەن تولەمدەردەن جالتارۋ دەرەكتەرى انىقتالدى.
