“Samuryq-Qazyna” AQ ekonomika jáne qarjy jónindegi basqarýshy direktory Aidar Rysqulov Biryńǵai zeinetaqy qoryndaǵy 1,5 trillion teńge kólemindegi qarajat energetikalyq jobalarǵa qalai jumsalatynyn egjei-tegjeili túsindirip berdi, dep habarlaidy Dalanews.kz.
Rysqulov el úkimeti ár jobany muqiiat qarastyratynyn atap ótti. Al basty operatorlar “Samuryq-Qazyna” jáne “Báiterek” holdingi bolady. Ekonomika jáne qarjy jónindegi basqarýshy direktor jobada qazaqstandyq júiege basymdyq beriletinin jetkizdi. Onyń sózinshe, jobalardy júzege asyrý úshin qarajat óz qajettiligine qarai bólinedi.
Sondai-aq ol biryńǵai zeinetaqy qorynan túsetin 1,5 trillion teńgeniń bir bóligi JEO jobalaryn qarjylandyrýǵa jumsalatynyn aitty. Esterińizge sala keteiik, Resei jylý elektr stantsiiasyn Qazaqstan úshin salyp jatyr. Qazirgi tańda reseilik seriktestermen úsh JEO-ny iske asyrý talqylanyp jatyr.
Buǵan deiin Qazaqstan úkimeti Qazaqstan Respýblikasy men Resei Federatsiiasy arasynda Kókshetaý, Semei jáne Óskemen qalalarynda kómirmen jumys isteitin jylý elektr stantsiialaryn salý jobasyna bailanysty qaýly daiyndaǵan bolatyn.
Osyǵan bailanysty Qazaqstannan “Samuryq-Energo” AQ tapsyrys berýshiniń qyzmetin atqarady. Al Reseiden Inter RAO kompaniiasyna kiretin “Inter RAO– Eksport” bas merdiger retinde jumys isteidi.
Atalmysh jobalar úsh kezeń boiynsha júzege asady. Birinshi kezeńde jobalardyń árqaisy úshin qajetti saraptamalarǵa bailanysty jobalyq qujattama ázirlenedi. Munda damý elektr stantsiialaryn qatty otynnan tabiǵi gazǵa yqtimal túrlendirý kózdeledi. Ekinshi kezeńde jumys qujattamasy ázirlenedi. Naqtyraq aitsaq, jabdyqtar men materialdardy jetkizý, sonymen qatar qurylys-montajdaý jáne iske qosý jumystary qamtylady. Al úshinshi kezeń elektr stantsiialarynyń ekologiialyq kórsetkishterin qamtamasyz etetin gazdy tazartý júiesine qatysty qyzmetter kórsetýdi qarastyrady.
Eske salaiyq, buǵan deiin Qazaqstanda jańa JEO qurylysyn Pýtinniń “sanktsiiaǵa ushyraǵan” oligarh dostarynyń kompaniiasy qolǵa alatyny habarlanǵan bolatyn.
Inter RAO málimdeýinshe, “Inter RAO - Eksport” kompaniiasynyń Qazaqstandaǵy jobalarǵa qatysýy EPC(M) merdigeri retinde qarastyrylady. Olar qurylys nysanyn keshendi jobalaýdy, salýdy jáne paidalanýǵa berýdi qamtamasyz etedi. Iaǵni, qazaqstandyq tapsyrys berýshige olardy júzege asyrý úshin qaryzǵa kommertsiialyq qarjy tartýǵa kómektesetinin jetkizdi.
Al “Inter RAO” - Pýtinniń dostary Boris Kovalchýk pen Igor Sechinge tiesili. Ekeýi de Reseidiń Ýkrainaǵa jasaǵan áskeri shabylýyna bailanysty halyqaralyq sanktsiiaǵa ushyrady.
Sonymen qatar, “Inter RAO” baqylaityn kompaniialar halyqaralyq sanktsiialardyń kesirinen birneshe ret mańyzdy kelisimsharttan qaǵylǵan. Osylaisha, tamyz aiynyń sońynda amerikandyq General Electric (GE) Inter RAO-men gaz týrbinalaryn óndirýden bas tartty.
