Qazaqstanda memlekettik qyzmettegi eń jas jáne eń egde sheneýnikterdiń reitingi jasaldy, dep habarlaidy Dalanews.kz Dailybiz.kz-ke silteme jasap.
Ashyq derekterge súiengen tizimde vitse-ministrler, ákimder, agenttik tóraǵalary men ortalyq memlekettik organdar basshylary qamtylǵan.
Eń jas sheneýnikter
Eń jas sheneýnikter reitinginde kósh bastaǵan – 32 jastaǵy Asylbek Ahmetjanov. Ol – oqý-aǵartý vitse-ministri. Memlekettik qyzmettegi eńbek ótili 9 jyl, ailyǵy – 1,52 mln teńge.
Ekinshi orynda 33 jastaǵy Ázimbek Pazylbekuly. Ol Túrkistan qalasynyń ákimi, eńbek ótili 12 jyl, jalaqysy – 836,9 myń teńge.
Úshinshi jáne tórtinshi oryndardy 34 jastaǵy sheneýnikter ielengen. Atap aitqanda, energetika vitse-ministri Qaiyrjan Tutqyshbaev (ótili 14 jyl) jáne jasandy intellekt pen tsifrlyq damý vitse-ministri Dmitrii Mýn (ótili 11 jyl). Ekeýiniń de ailyǵy – 1,52 mln teńge.
Besinshi orynda – ádilet vitse-ministri Bekbolat Moldabekov (34 jas, ótili 10 jyl).
Altynshy oryn – Óskemen qalasynyń ákimi Almat Aqyshov (35 jas, jalaqysy 836,9 myń teńge).
Reitingtiń qalǵan bóliginde de negizinen vitse-ministrler bar. Olardyń qatarynda jasandy intellekt jáne tsifrlyq damý vitse-ministri Rostislav Koniashkin, mádeniet jáne aqparat vitse-ministri Evgenii Kochetov, Básekelestikti qorǵaý jáne damytý agenttiginiń tóraǵasy Marat Omarov, aýyl sharýashylyǵy vitse-ministri Ermek Kenjehanuly, ekologiia jáne tabiǵi resýrstar vitse-ministrleri Nurlan Qurmalaev pen Mansur Oshýrbaev bar. Bul sheneýnikterdiń jasy 36–37 aralyǵynda.
Eń kári sheneýnikter
Eń egde sheneýnikter reitinginde 64 jastaǵy Nurlan Ábdirov birinshi orynǵa shyqty. Ol – Ortalyq sailaý komissiiasynyń tóraǵasy, memlekettik qyzmettegi ótili 43 jyl.
Ekinshi orynda – ekologiia jáne tabiǵi resýrstar ministri Erlan Nysanbaev (64 jas, ótili 41 jyl).
Úshinshi jáne tórtinshi oryndardy 62 jastaǵy sheneýnikter ielengen: ishki ister ministriniń orynbasary Igor Lepeha jáne Jetisý oblysynyń ákimi Beibit Isabaev.
Besinshi orynda – Bas prokýror Berik Asylov (61 jas).
Altynshy orynda – Batys Qazaqstan oblysynyń ákimi Nariman Tóreǵaliev.
Reitingtiń sońǵy bóliginde Aqmola oblysynyń ákimi Marat Ahmetjanov, Qostanai oblysynyń ákimi Qumar Aqsaqalov, qorǵanys ministriniń birinshi orynbasary Sultan Kamaletdinov jáne Petropavl qalasynyń ákimi Serik Muhamediev bar. Olardyń jasy – 60–61 aralyǵy.
Reiting derekteri Qazaqstanda basqarý júiesinde bir mezette ári jas kadrlar, ári ondaǵan jyldyq tájiribesi bar sheneýnikter qatar qyzmet atqaryp otyrǵanyn kórsetedi.
