Qazaqstanda 1 qazannan bastap jumyssyzdyq boiynsha áleýmettik tólem alý tártibine ózgerister engiziledi. Jańa erejege sáikes, tólemderdi alý merzimi qysqarady, dep habarlaidy dalanews.kz.
Buǵan deiin jumyssyzdyq boiynsha tólemder azamattyń áleýmettik saqtandyrý júiesine qatysý ótiline qarai alty aiǵa deiin taǵaiyndalatyn. Endi pilottyq joba aiasynda bul merzim úsh aiǵa deiin qysqartylady.
Járdemaqy mólsheri azamattyń joǵaltqan tabysynyń 45 paiyzyna deiin esepteledi. Alaida tólem kólemi eńbek ótiline bailanysty koeffitsientti eskere otyryp, jeti eń tómengi jalaqy mólsherinen aspaýy tiis.
Áleýmettik tólem alý úshin azamat aldymen mansap ortalyǵyna tirkelip, resmi túrde jumyssyz mártebesin alýy qajet. Jańa ózgeristerdiń maqsaty – eńbek naryǵyndaǵy belsendilikti arttyrý jáne azamattardy jumysqa ornalasýǵa yntalandyrý ekeni atap ótildi.
