Eńbek shartyn jasaý barysynda kásibi biliktilikti taný týraly qujat talap etilýi yqtimal. Eńbek jáne halyqty áleýmettik qorǵaý ministrligi bul qujat diplomnyń ornyn baspaitynyn, tek mamannyń daǵdylaryn rastaityn qosymsha qural bolatynyn málimdedi, dep habarlaidy dalanews.kz.
Búgin Májilis depýtattary birinshi oqylymda «Tehnikalyq jáne kásiptik bilim berý júiesin jetildirý, halyqtyń kóshi-qony máseleleri boiynsha Qazaqstan Respýblikasynyń keibir zańnamalyq aktilerine ózgerister men tolyqtyrýlar engizý týraly» zań jobasyn qarady.
Talqylaý barysynda depýtat Maksim Rojin jańa norma qabyldansa, tehnikalyq jáne kásiptik, joǵary nemese joǵary oqý ornynan keiingi bilim týraly diplom usyný mindeti joiyla ma degen saýal qoidy.
Eńbek jáne halyqty áleýmettik qorǵaý vitse-ministri Erbol Tuiaqbaev diplomnyń kúshi saqtalatynyn aitty.
Onyń sózinshe, diplom arnaiy bilim alǵanyn rastaityn negizgi qujat bolyp qala beredi.
– Biz diplomnyń mańyzyn tómendetip otyrǵan joqpyz. Diplom arnaiy bilim alǵandy rastaityn qujat retinde qalady, – dedi vitse-ministr.
Ol kásibi biliktilikti taný týraly qujat qosymsha qural retinde engiziletinin túsindirdi.
– Iaǵni adam eki qujatty qatar usyna alady: diplom men kásibi biliktilikti taný týraly qujatty, – dedi Tuiaqbaev.
Ministrlik ókiliniń aitýynsha, mundai qujat ásirese diplomy joq, biraq naqty kásibi tájiribesi men daǵdysy bar azamattar úshin mańyzdy bolmaq.
– Eger mamanda diplom bolmasa, biraq óziniń kásibi mashyǵyn dáleldei alsa, mundai jaǵdaida osy qujat eskeriledi, – dedi ol.
Bul norma qyzmet kórsetý salasy, qonaqúi biznesi, shashtaraz qyzmeti jáne basqa da servistik baǵyttarda jii qoldanylýy múmkin.
Vitse-ministr kásibi biliktilikti taný týraly qujat diplomnan bas tartý degendi bildirmeitinin taǵy da atap ótti.
– Diplom negizgi qujat bolyp qalady, al bul – qosymsha qural ǵana, – dep túiindedi Tuiaqbaev.
