Eńbek jáne halyqty áleýmettik qorǵaý ministrligi jumys ornyndaǵy harassmentke qatysty normalardy zańnamaǵa engizýdi kózdeitin zań jobasyn ázirlep jatyr. Bul týraly vedomstvo basshysy Asqarbek Ertaev Úkimettegi baspasóz máslihatynda málimdedi, dep habarlaidy dalanews.kz.
Ministrdiń aitýynsha, bastama Halyqaralyq eńbek uiymynyń usynymdary negizinde qolǵa alynǵan.
"Byltyr birinshi vitse-ministr qyzmetinde júrgenimde osy másele boiynsha kelissózder júrgizdik. Sol kezde birqatar memleketterge, onyń ishinde Qazaqstanǵa da “harassment” uǵymyn zańnamalyq deńgeide bekitý usynylǵan bolatyn", – dedi Ertaev.
Onyń sózinshe, qazirgi ýaqytta zań jobasy biznes qaýymdastyq ókilderimen talqylanyp jatyr.
Ministrlik ázirlegen qujatta jumys ornyndaǵy jynystyq qýdalaýǵa qatysty uǵymdy naqtylaý, sondai-aq mundai jaǵdailar anyqtalǵan kezde jumys berýshilerdiń mindetteri men jaýapkershiligin belgileý qarastyrylǵan.
"Zań jobasyna tiisti anyqtamalar men normalar engizildi. Sonymen qatar, osyndai faktiler tirkelgen jaǵdaida jumys berýshiniń jaýapkershiligi de aiqyndalady. Qazir túzetýler belsendi túrde talqylanyp jatyr. Qujatty biyl kúzde Parlament qaraýyna engizý josparlanyp otyr", – dedi ministr.
