Elimiz boiynsha zorlyq-zombylyqtan zardap shekken balalarǵa arnalǵan mamandandyrylǵan kómek kabinetteri ashylady. Bul kabinetterde kámeletke tolmaǵandarǵa «bir tereze» qaǵidaty boiynsha keshendi qoldaý kórsetiledi, dep habarlaidy Dalanews.kz.
Balaǵa qolaily ortada alǵashqy psihologiialyq kómekten bastap sot-meditsinalyq saraptamadan ótýge jáne beiindi mamandardyń qatysýymen saýalnama júrgizýge deiingi barlyq qajetti qyzmetter bir jerde kórsetiledi. Bul onyń kóptegen uiymdarǵa barý qajettiligin joiyp, psihologiialyq turǵydan qaita jaraqat alýyna jol bermeidi.
Atalǵan jańashyldyq 2025 jylǵy 30 jeltoqsanda Memleket basshysy qol qoiǵan «Quqyq buzýshylyqtardyń aldyn alý týraly» Qazaqstan Respýblikasynyń Zańynda kózdelgen. Norma 2026 jylǵy 2 naýryzdan bastap kúshine enedi. Jaqyn arada kabinetterdiń qyzmet qaǵidalary bekitilip, sodan keiin óńirlerde olardy kezeń-kezeńimen ashý josparlanýda.
Sonymen qatar zań aiasynda zorlyq-zombylyqqa, qatygezdikke, býllingke ushyraǵan nemese onyń kýási bolǵan kámeletke tolmaǵandardy anyqtaý jáne olarǵa kómek kórsetý qaǵidalary ázirlendi. Qujat osyndai balalardy anyqtaý tártibin, olarǵa kómek kórsetý tetikterin, sondai-aq memlekettik organdardyń, bilim berý uiymdarynyń, 111 bailanys ortalyǵynyń, Bala quqyqtary jónindegi ýákil men óńirlik ýákilderdiń ózara is-qimyl algoritmderin aiqyndaidy. Bul vedomstvoaralyq jedel áreket etýge jáne balalarǵa ýaqtyly keshendi kómek kórsetýge múmkindik bermek.
