Qazaqstan Úkimeti eldegi janar-jaǵarmai naryǵyndaǵy jaǵdaidy talqylady. Energetika ministrligi qazirgi tańda benzin, dizel otyny men aviatsiialyq janarmai qory jetkilikti ekenin, sondyqtan ishki naryqta tapshylyq bolmaitynyn málimdedi, dep habarlaidy dalanews.kz.
Energetika ministri Erlan Aqkenjenovtiń aitýynsha, eldegi janarmai qory halyqtyń suranysyn tolyq óteýge jetkilikti.
Al Ishki ister ministri Erjan Sádenov jyl basynan beri shekaradaǵy avtomobil ótkizý beketterinde munai ónimderin zańsyz alyp ótýdiń 593 áreketi toqtatylǵanyn aitty. Osy ýaqyt ishinde 40 myń litrden astam janarmai tárkilengen. Baqylaýdy kúsheitý úshin shekara mańyndaǵy ótkizý beketterinde qosymsha qyzmetkerler tartylǵan.
Tek sońǵy eki táýliktiń ózinde shekarashylar janarmaidy zańsyz alyp ótýdiń taǵy 61 áreketin anyqtaǵan. Quqyq buzýshylar qosymsha ornatylǵan baktar men kanistrlerge quiylǵan 3 tonnadan astam janarmaidy shekaradan ótkizbek bolǵan.
Sonymen qatar Memlekettik kirister organdary janarmaidyń kúmándi saýdasyna qatysty 62 janarmai quiý beketi men 22 shaǵyn munai óńdeý zaýytynyń qyzmetin tekserip jatyr. Úkimettiń málimetinshe, bul sharalar ishki naryqtaǵy turaqtylyqty saqtaý jáne zańsyz ainalymnyń aldyn alý maqsatynda júrgizilýde.
