Qazaqstan tyńshylyq jasady degen kúdikpen ustalǵan professor Iqboljon Qaraboevtyń isi týraly Ózbekstanǵa resmi túrde habarlaǵan. Ulttyq qaýipsizdik komitetiniń málimetinshe, aqparat ózbek tarapyna diplomatiialyq arnalar arqyly jetkizilgen, dep habarlaidy dalanews.kz.
QazTag málimetinshe, UQK tergeýge qatysty ózge derekterdi jariialamaǵan. Komitet muny zań boiynsha sotqa deiingi tergeý materialdaryn ashyq taratýǵa bolmaitynymen túsindirdi.
Buǵan deiin BBC Iqboljon Qaraboevtyń Qazaqstanda tyńshylyq jasady degen kúdikpen ustalǵanyn habarlaǵan edi. Ol Astanadaǵy Maqsut Nárikbaev ýniversitetinde halyqaralyq qatynastar páninen sabaq bergen. Qazir onyń isine qatysty tergeý júrip jatyr.
