Qazaqstandaǵy alǵashqy ashyq ushqyshsyz jolaýshylar áýe apparatynyń ushýy jáne Ortalyq Aziiadaǵy osyndai alǵashqy reis júzege asty, dep habarlaidy dalanews.kz.
Allur kompaniiasy EHang jáne QazTehna kompaniialarymen birlesip elimizde eVTOL sanatyndaǵy ushqyshsyz jolaýshylar apparattaryn engizý jáne keiinnen olardy jergiliktendirý jobasyn iske asyrýǵa kiristi.
Joba 2025 jyly Allur men álemdegi ushqyshsyz jolaýshylar apparattaryn óndirýdegi kóshbasshylardyń biri sanalatyn EHang kompaniiasy arasynda jasalǵan strategiialyq kelisim aiasynda júzege asyrylyp jatyr. Onyń negizgi maqsaty - Qazaqstanda jańa áýe mobildigi naryǵyn qalyptastyrý, joǵary tehnologiialyq óndiristi damytý jáne zamanaýi kólik sheshimderin engizý.
Jobanyń tanystyrylymy barysynda Astanada EH216-S ushqyshsyz jolaýshylar apparatynyń ashyq kórsetilim ushýy ótti. Qazaqstan Respýblikasynyń Kólik ministri Nurlan Saýranbaev apparattyń alǵashqy jolaýshysy boldy. Kórsetilim “Bolashaq oiyndary 2026” halyqaralyq týrniri aiasynda uiymdastyryldy.
EH216-S tolyqtai elektr qýatymen jumys isteidi, eki adamdy tasymaldai alady, saǵatyna 130 shaqyrymǵa deiin jyldamdyqpen ushady jáne bir zariadpen shamamen 35 shaqyrym qashyqtyqty eńseredi. Apparat tik kóterilip, tik qonady jáne aldyn ala belgilengen baǵyt boiynsha ushqyshsyz avtonomdy túrde qozǵalady.
Jobanyń alǵashqy kezeńinde týristik baǵyttardy damytý kózdelgen. Ushqyshsyz áýe apparattary Qazaqstannyń tabiǵi jáne tarihi kórikti jerleriniń ústinen 5-30 minýttyq ekskýrsiialyq reister oryndaidy. Keiinnen olar shuǵyl meditsinalyq kómek kórsetýge, dári-dármek jetkizýge, qutqarý jáne órt sóndirý jumystaryna, logistika salasyna paidalanylýy múmkin.
Sonymen qatar joba Qazaqstanda mundai apparattardyń óndirisin kezeń-kezeńimen jergiliktendirýdi qarastyrady. Bul jańa tehnologiialyq óndiristerdi qalyptastyryp, qosymsha jumys oryndaryn ashýǵa jáne mashina jasaý salasynyń jańa baǵyttaryn damytýǵa múmkindik beredi.
Is-shara barysynda Freedom Holding Corp. bas atqarýshy direktory Qýanyshbek Esekeev bul tehnologiialardyń Qazaqstannyń tsifrlyq ekonomikasyn damytýdaǵy mańyzyn atap ótti.
«Sálemetsiz be, qurmetti hanymdar men myrzalar! Sizdermen ozyq áýe tehnologiialarynyń kórsetiliminde kezdeskenime qýanyshtymyn. Búgin biz alys arman tehnologiiasy - elektr ushý apparatynyń kýási bolyp otyrmyz. Endi oǵan praktikalyq testten ótip, jańa kólik júiesiniń bir bóligine ainalýda. Búgin testik ushý “Bolashaq oiyndary” aiasynda ótýde de simvoldyq máni bar. Bul týrnir tsifrlyq jáne naqty álemdi biriktirip, sporttyń, kommýnikatsiianyń ózara is-qimylyn, jańa formatyn qalyptastyryp jatqanyn aiqyn kórsetedi. Bul batyl tehnologiia ideialardyń naqty sheshimderge ainalýynyń jarqyn kepili», - dedi Esekeev.
Kólik ministri Nurlan Saýranbaev mundai jobalar Qazaqstan úshin jańa kólik salasynyń negizin qalaitynyn aitty.
«Eń aldymen uiymdastyrýshylarǵa alǵys aitqym keledi. Olar óte úlken jumys atqardy. Óitkeni alǵashqy qadamdy jasaý árqashan ońai emes. Memleket tarapynan barlyq qajetti zańdar men normativtik-quqyqtyq aktiler qabyldandy. Bul - ekinshi kórsetilim. Búgin ózderińiz kórdińizder, alǵash ret adamdy, naqty aitqanda meni, osy apparatpen tasymaldadyq. Meniń oiymsha, kelesi qadam osyndai ushqyshsyz apparattardy týristik baǵyttarda paidalaný bolady», - dedi ministr.
Jýrnalisterdiń ushý áseri týraly suraǵyna jaýap bergen ministr apparattyń qaýipsiz ekenine senim bildirdi.
«Joq. Birinshiden, bul synaqtan ótken tehnologiia. Ol Qytaida burynnan qoldanylyp keledi, sondyqtan onyń qaýipsizdigine qatysty kúmán joq», - dedi Saýranbaev.
Ol ushý kezinde oiyna kelgen alǵashqy sózdi de jasyrmady.
«Qazaqstan, alǵa!» dep oiladym. Biz barlyq jańa tehnologiialarda aldyńǵy qatarda bolýymyz kerek. Jańashyldyqty birinshi bolyp qabyldaýǵa umtylýymyz qajet. Sebebi bolashaq - osy tehnologiialarda», - dedi ministr.
Ministrdiń aitýynsha, apparat óte jumsaq kóteriledi, alaida azdaǵan diril men shý baiqalady.
«Óte jumsaq kóteriledi. Biraq azdap diril bolady. Maǵan aldyn ala eskertkendikten, esh alańdaǵan joqpyn. Iá, azdap shý bolady. Ushý rejimine bailanysty. Apparat alǵa qozǵalǵan kezde vintterdiń jumysy ózgerip, sol kezde dybys kúshtirek estiledi», - dedi ol.
EHang kompaniiasynyń ókili Derren Qazaqstandaǵy búgingi kórsetilimdi tarihi oqiǵa dep atady.
«Búgin biz tarihi oqiǵanyń kýási boldyq. Qazaqstandaǵy alǵashqy ashyq jolaýshylar áýe apparatynyń ushýy jáne Ortalyq Aziiadaǵy osyndai alǵashqy reis júzege asty. Búginde EH216-S álemniń 24 elinde 100 myńnan astam qaýipsiz ushýdy oryndady. Qazaqstan osy tehnologiia engizilgen 24-shi memleket boldy. Bul EH216-S endi bolashaqtyń tujyrymdamasy ǵana emes, búgin qoldanýǵa bolatyn naqty ónim ári tehnologiia ekenin bildiredi», - dedi kompaniia ókili.
Onyń aitýynsha, Qazaqstannyń keń aýmaǵy men týristik áleýeti ushqyshsyz áýe júielerin jolaýshylar tasymaly, týrizm, qutqarý operatsiialary jáne meditsinalyq qyzmet kórsetý siiaqty kóptegen baǵytta paidalanýǵa múmkindik beredi.
Allur kompaniialar tobynyń basqarma tóraǵasy Aleksandr Lavrentev bul jobanyń tek tehnologiia kórsetilimi ǵana emes, Qazaqstanda jańa indýstriia qalyptastyrýdyń bastamasy ekenin aitty.
«Osydan bir apta buryn “Bolashaq oiyndarynyń” ashylýynda bul ushý apparaty tanystyrylǵan bolatyn. Al búgin biz osy zamanaýi tehnologiianyń alǵashqy ashyq kórsetilim ushýyn júzege asyrdyq. Kórsetilim ushýy - tek tehnologiiany tanystyrý emes, jobany naqty iske asyrýdyń mańyzdy kezeńi. Alǵashqy kezeńde týristik baǵyttardy damytý men osy apparattardy paidalanýǵa qajetti infraqurylymdy qalyptastyrý josparlanyp otyr. Kelesi kezeńde bul apparattardy Qazaqstanda óndirýdi igerip, kúndelikti ómirde keńinen qoldanýǵa múmkindik jasaý kózdelgen», - dedi ol.
EHang kompaniiasy aldaǵy ýaqytta Qazaqstannyń Kólik ministrligi, Allur jáne QazTehna kompaniialarymen birlesip bul tehnologiialardy turaqty paidalanýǵa engizýdi jáne qaýipsiz, intellektýaldy ári ekologiialyq taza áýe mobildigin kúndelikti ómirdiń bir bóligine ainaldyrýdy josparlap otyr.
